ТекIоныгъэшхом инэпэеплъ быракъхэм ащыщ

Я VII-рэ Дунэе дзэ-техническэ форумэу «Армия-2021» зыфиIорэр зыщызэфашIыжьыщтым ехъулIэу Молдавием ия 95-рэ шхончэо диви­зие ибыракъ Адыгэ Республикэм къыратыгъ.

Адыгеим и ЛIышъхьэу КъумпIыл Муратрэ я 49-рэ дзэм ипащэ иапэрэ гуадзэу, генералэу Валерий Плохотнюкрэ мы Iофтхьабзэм хэлэжьагъэх.

Къалэу Мыекъуапэ и Гупчэ мемориал щыкIогъэ Iофтхьабзэм джащ фэдэу къекIолIагъэх Адыгэ Республикэм и ­Къэралыгъо Совет — Хасэм и Тхьаматэу Владимир Нарожнэр, Адыгэ Республикэм и Премьер-министрэу Геннадий Митрофановыр, Адыгэ Респуб­ликэм иминистрэхэм я Кабинет хэтхэр, ветеран организациехэм ялIыкIохэр, юнармейцэхэр.

Молдавием ия 95-рэ шхончэо дивизие зэо гъогухэу зэпичыгъэхэр Адыгеим нэмыц-фашист техакIохэр зыщырафыгъэхэ лъэхъанми епхыгъэхэу щытых. 1942-рэ илъэсым бэдзэогъум дзэ формированием хэхьэрэ соединениехэм ащыщхэр Быракъ Плъыжьыр ыкIи Суворо-
вым иорден къызфагъэшъошэгъэ Верхнедрепровскэ шхончэо дивизием хэхьэгъагъэх. 1943-рэ илъэсым щылэ мазэм Мые­къуапэ шъхьафит шIыжьыгъэным иIахьышхо ащ хишIыхьэгъагъ.

Адыгеим июнармейцэхэм Молдавием ия 95-рэ шхончэо дивизие ибыракъ къараты-жьыгъ. Джы а быракъэу текIоныгъэшхом инэпэеплъ лъапIэхэм зыкIэ ащыщыр республикэм и Лъэпкъ музей чIэлъыщт.

Адыгеим и ЛIышъхьэ респуб­ликэм щыпсэухэрэм ацIэкIэ тарихъ мэхьанэ зиIэ быракъыр республикэм къызэрэратыгъэм пае Къыблэ дзэ коим ипащэхэм зэрафэразэр къыIуагъ.

«Тиреспубликэ шъхьафит зышIыжьыгъэ зэолIхэм инэу тафэраз. ТапэкIи тынаIэ тетэу мы быракъыр къэтыу­хъумэщт. Адыгэ Республикэм и Лъэпкъ музей ифэшъошэ чIыпIэ ащ щиубытыщт. Мыщ фэдэ та­къикъхэм тятэжъхэмрэ тятэжъ пIашъэхэмрэ лIы­хъужъныгъэу зэрахьагъэр, къэ­кIощт уахътэм цIыфхэр мамырэу, рэхьатэу щыпсэунхэм пае апсэ зэратыгъэр тыгу къэкIыжьы. Зэрэдунаеу ахэм арагъэлъэгъугъ ти­дзэ ыкIуачIэ зыфэдэр», — къыIуагъ КъумпIыл Мурат.

Дзэ-техническэ форумэу «Армия-2021» зыфиIорэм икIэуххэм къатегущыIэзэ рес­публикэм и ЛIышъхьэ къыхи­гъэщыгъ Урысыем и Президентэу Владимир Путиным мы Iофтхьабзэм еплъыкIэу фыриIэр. Ащ зэрилъытэрэмкIэ, дзэм ыкIуачIэ къэгъэлъэгъогъэным имызакъоу, зэрэдунаеу щынэгъончъэу щытыным пае зэкIэми ащ ткIуачIэ зэхэлъэу ты­фэлэжьэн, тизыкIыныгъэ дгъэпытэн зэрэфаем а Iофтхьабзэр къыфэджэ.

Адыгеим и ЛIышъхьэ Къыблэ дзэ коим ипащэхэм ыкIи дзэ гарнизонэу Мыекъуапэ щыIэм хэтхэм Адыгеим мыщ фэдэ форум щызэхэщэгъэным кIэщакIо зэрэфэхъугъэхэм апае зэрафэразэр къыIуагъ.

Джащ фэдэу къэзэрэугъои­гъэхэм закъыфигъэзагъ я 49-рэ дзэм ипащэ иапэрэ гуадзэу, генералэу Валерий Плохотнюк. Хабзэм икъулыкъухэм мыщ фэдэ Iофтхьабзэм изэхэщэн дэгъоу зэрэзэшIуахыгъэр, рес­публикэм идзэ подразделениехэм гъусэныгъэ дэгъу зэрадыряIэм афэгъэхьыгъэу ащ къы­Iуагъ. Адыгеим ипащэхэм ащ фэдэ зэдэлэжьэныгъэмкIэ зэ­ра­фэразэр къызыхегъэщым ыуж, дзэ-патриотическэ IофшIэнымкIэ джыри гъэхъагъэхэр ашIынхэу ар къафэлъэIуагъ.

АР-м и ЛIышъхьэ ипресс-къулыкъу