ГъэпсэфыпIэ дахэ хъущт

АР-м и ЛIышъхьэу КъумпIыл Мурат Мыекъуапэ щыпсэухэрэм зыкъыфагъазэзэ, поликлиникэу, кIэлэцIыкIу IыгъыпIэу, джэгупIэу, еджапIэу кIэу къалэм къыдашIыхьагъэхэм, псыкъефэх дахэхэм, паркэу агъэкIэжьыгъэхэм апае ярэзэныгъэ къыраIотыкIыгъ.

Ащ дакIоу псыхъоу Шъхьэгуа­щэ инэпкъэу къэлэ паркым дэжь щыIэм изэтегъэпсыхьан, ар зэпызычырэ лъэсрыкIо лъэ­мыджым игъэцэкIэжьын алъэныкъокIэ Iофхэм язытет къыкIэупчIагъэх.

Республикэм ипащэ къызэриIуагъэмкIэ, Адыгеим социальнэ ыкIи экономикэ хэхъоныгъэ­хэр ышIынхэм фытегъэ­псыхьэгъэ Унэе программэм къыдыхэлъытагъэу проектышхо­хэр респуб­ликэм щыпхыращых. Ахэм зэу ащыщ Шъхьэгуащэ инэпкъхэм ягъэпытэн ыкIи гъэп­сэфыпIэ чIыпIакIэ ащ щышIыгъэныр. Ащ ишIуагъэкIэ псыхъом псыр къыдэкIыным ищынагъо щыIэжьыщтэп, паркми нахь зиушъом­бгъущт. Къэлэ бассейным ишIыни, лъэсрыкIо лъэмыджым игъэ­кIэжьыни анаIэ тет.

Мы уахътэм «Мэздахэ» зыдэщыIэ районыр зэрэзэтырагъэ­псыхьащт проектми Iоф дашIэ. Гектар 435-рэ хъурэ мэз-парк чIыпIэм лъэсрыкIохэм, кушъхьэфачъэхэм ыкIи шыухэм апае гъогухэр фашIыщтых, тIысыпIэхэр щагъэуцущтых, спорт ыкIи кIэлэцIыкIу джэгупIэхэр щагъэпсыщтых, архитектурнэ шIыкIэ зэ­фэшъхьафхэмкIэ агъэдэхэщт. Джащ фэдэу «пикникхэр» зыщы­зэхащэщт чIыпIэхэр хэушъхьафыкIыгъэу фашIыщтых.

«Мэздахэ» ирайон зекIоным фытегъэпсыхьэгъэ закъоу щымытэу, унагъохэм языгъэпсэфыпIэу, псауныгъэмкIэ зишIуагъэ къэкIощт чIыпIэ дахэу хъущт.