Къихьащт илъэсым аухыщт

Мыекъуапэ къэзыухьащт автомобиль гъогум ишIын Адыгеим щылъагъэкIуатэ. ПсэолъакIэм ишIуагъэкIэ республикэм икъэлэ шъхьаIэ, анахьэу урамэу Хьахъуратэм, щызекIорэ транзит транспортыр хэпшIыкIэу нахь макIэ хъущт.

Адыгэ Республикэм и ЛIышъхьэу КъумпIыл Мурат Insta­gram-м щыриIэ официальнэ нэкIубгъом къыщыриIотыкIыгъ проектым игъэцэкIэн зэрэлъыкIуатэрэр.

Гъогум ишIын едзыгъуищэу зэтеутыгъ. Апэрэр 2009-рэ илъэсым зэшIуахыгъ. Ащ къызэ­рэдилъытэу, километри 9 зикIы­хьэгъэ трассэу, къутырэу Гавердовскэм блэкIэу ТIуапсэ екIолIэрэ автомобиль гъогум нэсырэр ашIыгъ. 2019-рэ илъэсым Урысыем и Правительствэ иIэпыIэгъукIэ ятIонэрэ едзыгъор рагъэжьагъ. Ащ къызэригъэ­нафэрэмкIэ, километри 10,5-рэ зикIыхьэгъэ автомобиль гъогоу лъэмыджищ зыхэтыщтыр агъэ­псыщт. Ар ШытхьалэкIэ укъикIы­мэ, Мыекъуапэ идэхьэгъу щегъэжьагъэу Джаджэм екIурэ гъогум нэс. Мы илъэсым къыкIоцI IофшIэнхэр аухынхэу щыт. Ящэнэрэм икIыхьагъэ километри 7,5-рэ хъущт, ар къутырэу Пролетарскэмрэ къуаджэу Мэфэхьаблэрэ якIолIэщт. Ащ игъэцэкIэн 2022-рэ илъэсым аухынэу ары.

— Проектым Мыекъуапэ щыпсэухэрэм ямызакъоу, тихьакIэхэми шIуагъэ къафихьыщт. Сыда пIомэ, Темыр Кавказым ишъолъырхэм къа­рыкIхэу хы ШIуцIэм кIохэрэмкIэ мы гъогур анахь кIэкI хъущт. Джащ фэдэу транспортым ылъэныкъокIэ респуб­ликэм амалхэу IэкIэлъхэм заушъомбгъущт, инвестициехэмкIэ Мыекъуапэ нахь хъоп­сагъо хъущт, Адыгеим икъэлэ шъхьаIэ иэкологие нахьышIу хъущт, — къыхигъэщыгъ КъумпIыл Мурат.

Мыекъуапэ къэзыухьащт гъо­гум ишIын пэIухьанэу 2021-рэ илъэсым сомэ миллион 600, 2022-м – сомэ миллиард 1,6-рэ республикэм къыIэкIэхьащт. Мылъкур федеральнэ бюджетым къыхэхыгъ.