Нахь къызэрыкIо хъугъэ

БлэкIыгъэ илъэсым, зэпахырэ узэу дунаир зэлъызыкIугъэм илъэхъан, цIыфхэр нахь макIэу зэхэхьанхэм пае пэIудзыгъэ шIыкIэм тетэу, медицинэ учреждением къыгъэхьазырыгъэ тхылъхэм къапкъырыкIыхэзэ, сэкъатныгъэу цIыфым иIэр зыхахьэрэ купыр фагъэнэфэнэу, пенсиери ащ тетэу къыфалъытэнэу УФ-м и Президент унашъо къышIыгъагъ. Ар лъэшэу цIыфхэм къызэрашъхьэпагъэр уахътэм къыгъэлъэгъуагъ.

Мы илъэсым имэлылъфэгъу мазэ Владимир Путиныр Джэ­псалъэу къышIыгъэми мы Iофым къыщыфигъэзэжьи, ащ фэдэ шIыкIэр хабзэ ашIынэу, 2022-рэ илъэсэу къэкIощтым къыще­гъэжьагъэу цIыфхэм къамы­чъыхьэу, тхылъхэр къамыугъой­хэу, «зы шъхьаныгъупчъэ» шIыкIэкIэ федеральнэ пособиехэр, пенсиехэр, социальнэ ахъщэ тынхэр, нэмыкI фэIо-фашIэхэр зэкIэ агъэпсынхэ амал яIэным къыфэкIонхэу Правительствэм пшъэрылъ къыфи­шIыгъ.

Ар гъэцэкIэгъэным фэшI сэкъатныгъэ зиIэхэм япенсие ыкIи социальнэ ахъщэ тынхэм ащыщхэм ягъэнэфэн нахь къызэрыкIоным фэгъэхьыгъэ хэбзэгъэуцугъэр агъэхьазырыгъ ыкIи УФ-м и Къэралыгъо Думэ хаплъи ыштагъ.

НахьыпэкIэ сэкъатныгъэ зиIэ хъугъэм пенсиер фагъэнэфэным пае чэзыухэм ахэсын, лъэIу тхылъыр, нэмыкIхэу ищыкIагъэхэр ытынхэ фаеу хъу­щтыгъ. ЗаконыкIэм къызэрэщиIорэмкIэ, медико-социальнэ уплъэкIунхэм цIыфым сэкъатныгъэ зэриIэр къыгъэнэфагъэ­мэ, а къэбарыр зипсауныгъэ зэщыкъуагъэхэм яфедеральнэ реестрэ дагъэхьащт. ПенсиехэмкIэ фондым испециалистхэм ащ къыпкъырыкIыхэзэ пенсиер фагъэнэфэщт. ЦIыфым тхылъхэр ыугъоинхэу, чэзыухэм ахэсынэу, ары пакIошъ, фондым екIолIэнышъ, лъэIу тхылъыр ытынэу ищыкIэгъэжьэп.