Казань щыбэнэщтых

Урысыем икIэлэеджакIохэу илъэс 12 – 14 зыныбжьхэм самбэмкIэ язэнэкъокъу Iоныгъом и 9 – 14-м Казань щыкIощт.

— Адыгеим ибэнэкIо 16 зэIукIэгъухэм ахэлэ­жьэщт, — къытиIуагъ республикэм самбэмкIэ испорт еджа­пIэ ипащэу, спортымкIэ дунэе класс зиIэ мастерэу Делэкъо Адамэ. – Адыгэ Республикэм изаслуженнэ тренерхэу Гъомлэшк Алый, Джарымэкъо Рустам, тренерэу Хьабэхъу Адамэ бэнакIохэм ягъусэхэу Казань щызэхащэщт зэнэкъокъум хэлэжьэщтых.

ТикIэлэеджакIохэу Хьакъуй Эльдар, Едыдж Сэлымэ, Давид Абиян Урысыем и Къыблэ шъолъыр самбэмкIэ изэнэкъокъу апэрэ чIыпIэхэр къыщахьыгъэх. Казань щыкIощт зэIукIэгъум гъэхъагъэ щашIынэу тагъэгугъэ. Адыгэ Республикэм ихэшыпыкIыгъэ командэ хэт кIалэхэм зэнэкъокъум яшъыпкъэу зыфагъэхьазыры. Урысыем апэрэ ыкIи ятIонэрэ чIыпIэхэр къыщызыхьыхэрэр Европэм, дунаим якIэух зэнэкъокъухэм ахэлэжьэщтых.

Сурэтым итхэр: Хьакъуй Эльдар, ащ итренерэу Гъомлэшк Алый гупчэм итых.

­