ГазрыкIопIакIэр атIупщыгъ

Адыгеим и ЛIышъхьэу КъумпIыл Му­ратрэ ООО-у «Газпром меж-ре­гионгаз» зыфиIорэм газыр аIэкIэ гъэхьэгъэнымкIэ игенеральнэ пащэ игуадзэу Юрий Пахомовскэмрэ Джэджэ районым километри 9,28-рэ зикIыхьэгъэ газрыкIуапIэр щытIупщыгъэным епхыгъэ Iофтхьабзэм тыгъуасэ хэлэжьагъэх.

Мы Iофтхьабзэм джащ фэдэу хэлэжьагъэх АО-у «Газпром газораспределение Майкоп» зыфиIорэм игенеральнэ пащэу Игорь Сырчиныр, Адыгэ Республикэм экономикэ хэхъоныгъэмкIэ ыкIи сатыумкIэ иминистрэу Шэу­джэн Заур, мэкъу-мэ­щымкIэ министрэу Къуанэ Анзаур, культурэмкIэ министрэу Аулъэ Юр, му­ниципальнэ образованиеу «Джэджэ районым» иадминистрацие ипащэу Андрей Таранухиныр. Урысые проектэу «Эстафета газа» зыфиIорэм тегъэ­псыхьагъэу газрыкIуапIэр атIупщыгъ, Президентэу Владимир Путиным хэ­гъэгум ипсэупIэхэм газыр аIэкIэгъэхьэгъэнымкIэ пшъэрылъэу къафишIы­гъэхэм ар адештэ.

Мы проектым респуб­ликэмкIэ къыхиубытагъ къутырэу Днепровскэр. Джащ фэдэу къутырхэу Козополянскэр, Карцевыр ыкIи Колхознэр чIыопс газым пашIагъэх. Адыгеим и ЛIышъхьэ а хъу­гъэ-шIагъэмкIэ къоджэдэсхэм афэгушIуагъ.

ГазрыкIопIакIэм ишIуагъэкIэ Джэджэ районым пэIудзыгъэ псэупIи 6-мэ газыр аIэкIэхьащт, уни 153-мэ газыр аращэ­нымкIэ ищыкIагъэр зэкIэ хьазыр.
«Республикэм ипсэупIэ анахь цIыкIухэм газыр къызэралъыIэсырэр непэ тинэрылъэгъу хъугъэ. Урысыем нахьи, гуры­тымкIэ пштэмэ, тиреспуб­ликэ газыр зэращы­IэкIагъахьэрэр нахь лъаг, 2026-рэ илъэсым ехъулIэу зэрэпсаоу Адыгеим газыр IэкIахьэ хъущт», — къыхигъэщыгъ Юрий Пахо­мовскэм.

Адыгеим и ЛIышъхьэ компаниеу «Газпромым» ипащэхэм зэрафэразэр къыIуагъ ыкIи социальнэ газификациемкIэ пшъэ­рылъхэу яIэхэм афэгъэ­хьыгъэу къыIотагъ.

«ГазрыкIуапIэр зэрэтшIыгъэм къикIырэп Iоф­шIэныр ащ щытыу­хыгъэу. Джы газыр цIыф­­хэм яунэ­хэм арытщэн фае, къэ­ралы­гъори хьазыр ащкIэ Iэпы­Iэгъу афэхъунэу. Пар­тиеу «Единэ Россием» игъо ылъэгъугъ ыпкIэ хэ­мылъэу чIыгу Iахьхэм ягъунапкъэхэм газыр афы­ращэлIэнэу. Хэгъэгум и Президентэу Владимир Путиным ащ ды­ригъэштагъ ыкIи пшъэ­рылъхэр афишIыгъэх», — къыIуагъ Адыгэ Рес­публикэм и ЛIышъхьэ.

Къэралыгъом ипащэ къыгъэуцугъэ пшъэрылъхэр гъэцэкIагъэ зыхъу­хэкIэ, 2022-рэ илъэсым ыкIэм нэс Адыгеим ипсэу­пIэ 207-мэ адэт унэ мин 16,8-м ехъумэ газыр икъоу аIэкIэхьащт. ПэшIорыгъэшъэу къызэрэрадзагъэмкIэ, Джэджэ районым ипсэупIэ 24-рэ, чIыгу Iахь 1752-рэ ащ къыхиубытэщт.

Къоджэдэсхэм гущыIэгъу зафэхъум КъумпIыл Мурат къафиIотагъ транспорт, инженер ыкIи социальнэ инфраструктурэм хэхъоныгъэ ашIынымкIэ, псэупIэхэр зэтегъэпсы­хьэгъэнхэмкIэ гухэлъхэу яIэхэм афэгъэхьыгъэу, зыщыпсэухэрэ чIыпIэхэм нахь хэхъоныгъэ ашIыным, нахь зэтегъэпсыхьагъэ хъунхэм ежь цIыфхэри чанэу къыхэлэжьэнхэу ар къяджагъ.

БэмышIэу къутырым щашIыгъэ ФАП-р Адыгеим и ЛIышъхьэ къыплъы­хьагъ ыкIи вакцинациемкIэ мобильнэ пункт ащ къызэрэщызэIуахыщтыр ариIуагъ. Ащ нэмыкIэу программэу «Земский доктор» зыфиIорэм къыдыхэлъытагъэу къутырым Iоф щишIэнэу специалист агъэкIощт.

Культурэм и Унэ гъэцэкIэжьын IофшIэнхэр зэрэщыкIохэрэр зызэ­рагъашIэ нэуж Адыгэ Республикэм культурэмкIэ и Министерствэ пшъэрылъ фашIыгъ мы илъэсым ыкIэм ехъулIэу IофшIэнхэр аухынхэу ыкIи ищыкIэгъэ оборудованиемкIэ зэтырагъэпсыхьанэу.

«Газыр щыIэмэ, чIыпIэхэм нахь хэхъоныгъэ ашIынымкIэ амалыкIэхэр яIэ хъущтых; ягупсэ къутырхэм, къуаджэхэм цIыфхэр къадэнэщтых ыкIи Iоф ащашIэщт», — къыхигъэщыгъ АР-м и ЛIышъхьэ.

Ащ нэужым КъумпIыл Муратрэ Юрий Пахомовскэмрэ Босенкэхэм яунагъо щыIагъэх. Апэрэу газыр зэращэлIэщтхэм ахэр ащыщых.

КъумпIыл Муратрэ Юрий Пахомовскэмрэ ате­гущыIагъэх Адыгеим ичIыпIэхэу джыри икъоу газыр зыIэкIэмыхьагъэхэм зэ­ранагъэсыщтхэмкIэ гухэлъ­хэу яIэхэм. Шъугу къэд­гъэкIыжьын: 2020-рэ илъэ­сым чъэпыогъум ПАО-у «Газпромым» и ГъэIоры­шIапIэ и Тхьаматэу Алексей Миллеррэ АР-м и ЛIышъхьэу КъумпIыл Муратрэ республикэм 2021 — 2025-рэ илъэсхэм газыр зэраIэкIагъэхьащтым ипрограммэ кIэтхагъэх. «Газпромым» иинвести­циехэр сомэ миллиарди 3,4-рэ фэдиз хъущтых. 2005 — 2020-рэ илъэсхэм ащ фэдэ программэм телъытагъэу километрэ 204-рэ фэдиз зикIыхьэгъэ газрыкIуапIэхэр ашIыгъагъэх.

2026-рэ илъэсым нэс республикэм ирайонищмэ япсэупIэ 17-мэ газыр аIэкIэгъэхьэгъэным пае газрыкIопIэ 15 джыри ашIы­нэу щыт.

Юрий Пахомовскэм къызэриIуагъэмкIэ, нэ-мыкI чIыпIэхэм газыр аIэкIэгъэхьэгъэнымкIэ, анахьэу етIани индуст­риальнэ паркыр зыща­гъэпсырэ Тэхъутэмыкъое районым IэкIагъахьэрэр нахьыбэ шIыгъэнымкIэ амалхэр щыIэ хъущтых.

«Хэгъэгур пштэмэ, га­зыр зэраIэкIагъахьэ­рэмкIэ Адыгеир пэрытныгъэр зыIыгъхэм ащыщ — процент 90-м ехъу. ДжырэкIэ гухэлъэу тиIэр республикэм ипсэу­пIэхэм газыр зэраIэкIэдгъахьэрэм ипсынкIагъэ хэдгъэхъоныр ары», — къыIуагъ КъумпIыл Мурат.

АР-м и ЛIышъхьэ ипресс-къулыкъу