Къуалъхьэ къызэраIихы­гъэмкIэ агъэмысэ

Урысыем и Следственнэ комитет иследственнэ гъэIорышIапIэу Адыгеим щыIэм МыекъуапэкIэ иследственнэ отдел изэфэхьысыжьхэмкIэ, полицием икъулыкъушIэщтыгъэм лажьэ иIэу хьыкумым ылъытагъ ыкIи уголовнэ Iоф къызэIуихыгъ. УФ-м и Уголовнэ кодекс истатьяу 290-м къызэригъэнафэу, къуалъхьэ къызэраIихыгъэм фэшI ар агъэмысэ.


ЩынэгъончъэнымкIэ федеральнэ къулыкъум къыгъэхьазырыгъэ материалхэм къапкъырыкIыхэзэ полицием иIофышIэщтыгъэм уголовнэ Iоф къыфызэIуахыгъ.

Следствием ыкIи хьыкумым зэрагъэунэфыгъэмкIэ, лажьэ зиIэм Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм иподразделениехэм ащыщ горэм ипащэу Iоф ышIэзэ, 2019-рэ илъэсым шэкIогъум ыкIэхэм республикэм щыпсэурэ хъулъфыгъэу бзэджэшIагъэ зезыхьагъэу уголовнэ пшъэдэкIыжь зытыралъхьанэу щытыгъэм ахъщэ къыритымэ уголовнэ Iоф къыфызэIуамыхынэу ыгъэгугъагъ. Ащ ыуж мэфэ заулэ тешIагъэу ахъщэ къуалъхьэ къыIихыгъ ыкIи ежь зыфаем пэIуигъэхьагъ.

Хьыкумым иунашъокIэ хъулъфыгъэм илъэсищ хьапс тыралъхьагъ, джащ фэдэу илъэсищ пIалъэкIэ хэбзэ IофшIэн ыгъэцэкIэн фимытэу унашъо ашIыгъ.