Республикэ гъэзетэу «Адыгэ макъэм» илъэс 23-рэ Iоф щызышIэгъэ Къэзэнэ Юсыф идунай зэрихъожьыгъэр лъэшэу тыгу къеуагъ.
Теуцожь районым икъуаджэу Къунчыкъохьаблэ къыщыхъугъ. ИкIэлэцIыкIугъом къыщегъэжьагъэу ишIэныгъэ зэрэхигъэхъощтым, лъэпкъ шэн-хабзэхэр зэригъэшIэнхэм пылъыгъ. Унэгъо Iужъоу зыщыпсэурэм щызэхихырэр щыIэныгъэм щигъэфедэщтыгъ. Лъэпкъ Iофыгъохэм нахь апыщагъэ хъугъэу 1998-рэ илъэсым шышъхьэIум и 11-м республикэ гъэзетэу «Адыгэ макъэм» щылажьэу ыублагъ.
Гъэзетым икIэтхэн, зэхэщэн Iофхэм гуетыныгъэу афыриIэр щыIэныгъэм къыщылъагъощтыгъ. «Адыгэ макъэр» къизытхыкIыхэрэм, еджэ зышIоигъохэм япчъагъэ хэхъонымкIэ Къэзэнэ Юсыф егъэжьэпIэшIоу ышIыгъэхэр «Адыгэ макъэм» иредакцие шIукIэ къетэжьыгъэх.
ЧIыгужъым фэныкъохэу, тэри тафэныкъоу тызэрэпсэурэм, Кавказ икъушъхьэ нэгуфхэр тилъэпкъэгъухэм къызэряжэхэрэр Къэзэнэ Юсыф зэдэгущыIэгъухэм къащыхигъэщыныр шэны фэхъугъагъ.
Философие лъэпкъ гупшысэ зыхэлъ тхыгъэхэр «Адыгэ макъэм», «Гъуазэм» къащыхиутыхэзэ, имурадхэр цIыфхэм алъигъэIэсы шIоигъуагъ. Къунчыкъохьаблэ щыщхэу Мыекъуапэ щыпсэухэрэм я «Адыгэ Хасэ» ыцIэкIэ лъэпкъ Iофыгъохэр ыгъэцакIэщтыгъэх.
Республикэ общественнэ движениеу «Адыгэ Хасэм» и Хэсашъхьэ хэтэу къоджэ щыIакIэм изыкъегъэIэтын, адыгабзэм изэгъэшIэн, игъэфедэн, лъэпкъым итарихъ изэгъэшIэн, нэмыкIхэм афэгъэхьыгъэ Iофыгъохэм кIэщакIо бэрэ афэхъугъ.
Адыгэ Республикэм изаслуженнэ журналистэу, общественнэ-политикэ щыIакIэм чанэу хэлэжьэрэ Къэзэнэ Юсыф ыгу зэIухыгъэу, шъыпкъагъэ хэлъэу псэущтыгъ. Культурэм, искусствэм, спортым апыщагъэхэу нахьыжъхэм якуп хэтхэм язэхэщэкIошIоу щытыгъ. Филармонием, Лъэпкъ театрэм, стадионым ащыкIохэрэ Iофтхьабзэхэм лIэуж зэфэшъхьафхэр ащызэIугъэкIэгъэнхэм мэхьэнэ ин ритыщтыгъ.
«Адыгэ макъэм» Iоф щишIэзэ, гузэжъогъу чIыпIэ ифагъэм ишIуагъэ ригъэкIынымкIэ шIыкIабэ къызэригъотыщтыгъэр тщыгъупшэрэп. ЦIыфым ицIыфыгъэ щыIэныгъэм къызэрэщылъагъорэр изекIокIэ-шIыкIэхэм къахэщыщтыгъ.
Культурэм, искусствэм ащыриIэ ныбджэгъухэм Къэзэнэ Юсыф лъытэныгъэ ин къыфашIы. Псэ зыпыт зэIукIэгъухэу зэхищэхэрэм пIуныгъэ мэхьанэу яIэр кIэлэеджакIохэм, ны-тыхэм зэралъыIэсырэм ыгъэгушхощтыгъ. Гъэзетэу «Адыгэ макъэр» дунаим тет адыгэхэм агу къигущыIыкIэу, зэлъэпкъэгъухэр зэфищэхэу, республикэм ис лъэпкъхэм язэфыщытыкIэхэр ыгъэпытэхэу ылъытэщтыгъ. «Адыгэ макъэм» ымакъэкIи, игупшысэкIи псэм псэ къыпигъэкIэн зэрилъэкIырэр щыIэныгъэм къыщыхигъэщыщтыгъ.
Къызыщытхъужьыныр, цIыфым шIоу фишIагъэм тегущыIэныр ишэныгъэхэп. Гум пыкIырэр псэм зэрэхэхъожьырэр цIыфыгъэ шапхъэхэм арипхыщтыгъ. Гъэзетым икъитхыкIын ехьылIэгъэ Iофхэр лъэпкъ шIэжьым епхыгъэхэу зэригъэцакIэщтыгъэхэр «Адыгэ макъэм» иредакцие щагъэлъапIэщтыгъ. Гъэзетеджэхэм ащ ехьылIагъэу фэбагъэ зыхэлъ гущыIэу къаIуагъэр макIэп.
Лъытэныгъэ ин зыфэтшIырэ Къэзэнэ Юсыф аужырэ илъэсым хьылъэу сымэджагъ. Илъэс 75-м итэу идунай ыхъожьыгъ. ЦIыф шIагъом ыгу къытемыожьми, иIофшIагъэкIэ къытхэтэу тэлъытэ. Иунагъо, Iахьылхэм тафэтхьаусыхэ. Къэзэнэ Юсыф Тхьэм джэнэт къыритынэу тыфэлъаIо.
Гъэзетэу «Адыгэ макъэм» иредакцие иIофышIэхэр.