КIэлэцIыкIу IыгъыпIи 4 атыщт

Мы илъэсым ыкIэм нэс кIэлэцIыкIу IыгъыпIи 4-мэ яшIын Адыгеим щаухынэу щыт, чIыпIи 120-рэ зиIэщт ясельнэ купхэри ахэм къадыхэ­лъытэгъэщтых.

Гъэсэныгъэм иучреждении 3-р Красногвардейскэ районым къиу­цощтых: селохэу Белэмрэ Садовэмрэ ыкIи къуаджэу Хьати­къуае. Зы кIэлэцIыкIу IыгъыпIэр Шэуджэн районым икъутырэу Тихоновым щагъэпсыщт.

Адыгеим и ЛIышъхьэу КъумпIыл Мурат псэолъэшI IофшIэнхэр зэрэлъыкIуатэхэрэм ынаIэ тет.

Культурэм и Унэ 17-мэ къа­IэкIэхьащт

Партиеу «Единэ Россием» ипроектэу «Культура малой Родины» зыфиIорэм ишIуагъэкIэ, республикэм ит культурэм иучреждениехэм яматериальнэ-техническэ зытет гъэпытэгъэным фытегъэпсыхьагъэу республикэм сомэ миллиони 6-м ехъу субсидиеу къыIэкIэхьагъ.

АР-м культурэмкIэ и Минис­тер­ствэ къызэрэщаIуагъэмкIэ, ащ къыдыхэлъытагъэу къащэфырэ оборудованиякIэр шъолъырым ит культурэм и Унэ 17-мэ атырагуа­щэ. ГущыIэм пае, блэкIыгъэ илъэ­сым игъэкIотыгъэ гъэкIэжьынхэр зыщыкIогъэ Адыгэкъалэ дэт лъэпкъ культурэм и Гупчэ сомэ миллион 1,5-м ехъу зытефэрэ оборудо­ваниерэ оргтехникэрэ ыщэфыгъ.