УФ-м и Президентэу Владимир Путиным Джэпсалъэу мыгъэ къышIыгъэм федеральнэ пособиехэм, пенсиехэм, социальнэ ахъщэ тынхэм, нэмыкI фэIо-фашIэхэм ягъэпсын цIыфхэм нахь афэгъэпсынкIэгъэнэу, къамычъыхьэу, тхылъхэр къамыугъоихэу «зы шъхьаныгъупчъэ» шIыкIэкIэ зэшIуахын амал ятыгъэнэу Правительствэм пшъэрылъ къыщыфишIыгъагъ.
Президентым иунашъо игъэцэкIэнкIэ зы лъэбэкъоу щыт амалыкIэу къэралыгъо фэIо-фашIэхэм япортал къыты хъугъэр. ЦIыфым къызфигъэфедэн ылъэкIыщт фэIо-фашIэм, тхылъэу ащ пае ыгъэхьазырын фаехэм алъыхъужьын, уахътэ атыригъэкIодэжьын имыщыкIэгъэжьэу ашIыгъ.
Къэралыгъо фэIо-фашIэхэм япортал къызызэIупхыкIэ, улъыхъожьын имыщыкIагъэу, фэIо-фашIэу о пшъхьэкIэ къыптефэрэри, пIалъэу е нэмыкI шапхъэу пылъхэри щыгъэнэфэгъэщтых. ГущыIэм пае, псэупIэ-коммунальнэ фэIо-фашIэхэм апае субсидие къыуатын фаемэ, уигражданствэ, уиунагъо исым ипчъагъэ, псэупIэм итхагъэр зыфэдизыр къыдэлъытагъэхэу, тхылъэу бгъэхьазырын фаехэр итхэгъэщтых.
УФ-м экономикэ хэхъоныгъэмкIэ и Министерствэ къызэритыгъэмкIэ, 2023-рэ илъэсым нэс федеральнэ фэIо-фэшIэ 600-м ехъумэ апае мы порталыр цIыфхэм IэпыIэгъу къафэхъунэу ашIыщт, 2024-м нэс шъолъыр ыкIи муниципальнэ фэIо-фашIэхэри къырагъэхьащтых.