«А зыр ары хэкIыпIэр»

Мамыекъо Сусан, Адыгэкъалэ икIэлэцIыкIу IыгъыпIэу «Чебурашка» зыфиIорэм икIэлэпIу.

— Сэ кIэлэцIыкIухэм Iоф адэсэшIэ, ахэм ящынэгъончъагъэ сисэнэхьат пшъэрылъэу къысфигъэуцухэрэм ащыщ. Ащ имызакъоу, сиунагъо, сисабыйхэми сыгу афэгъу, зэпахырэ узыр къахэсхьанкIэ сэщынэ. А зэпстэумэ сакъыпкъырыкIи, коронавирусыкIэм пэшIуекIорэ вакцинэр гъатхэм зыхязгъэлъхьагъ.

Прививкэр сшIыны зэхъум сыгу щэч горэ къимыхьагъэу щытэп, узыр зэрэтимынэIуасэм фэд, вакцинакIэри дэгъу дэдэу тэ цIыф къызэрыкIохэм тшIэрэп. Апэрэ Iахьыр зысэшIым температурэр дэкIоегъагъ, гъэретынчъи сыхъугъагъ, ау ащ фэдэ гумэкIыгъо тIэкIу къыздихьын зэрилъэкIыщтыр шIэныгъэлэжьхэми, врачхэми къаIуагъэу щытыти, сыкъагъэщтагъэп. ПсынкIэуи а зэпстэур текIыгъ.

Мы уз тхьамыкIагъоу цIыфхэр зыгъалIэхэрэм, лъэшэу нахьыбэр зыгъэсымаджэрэм уебэныным нэмыкI шIыкIэ иIэп сшIошIы. СыдигъокIи ащ фэдэ зэпахырэ узхэр вакцинэкIэ къызэтырагъэуцощтыгъ, мыщи а зыр ары хэкIыпIэу иIэр.

ХЪУТ Нэфсэт.