ЯбгъэшIымэ нахь тэрэз

Зэпахырэ узым джыри зиушъомбгъужьыгъэу, сымаджэ хъухэрэм япчъагъэ нахьыбэ мэхъу зэпыт. Мы аужырэ мазэм ахэм япчъагъэ мафэ къэс нэбгырэ 50-м ехъу. Мы уз  лъэшым ыпкъ къикIыкIэ зидунай зыхъожьыхэрэми ахэхъо.

Узыр къыппымыхьаным пае узфэсакъыжьын фае, цIыф зэхахьэхэм уахахьэ хъущтэп, маскэр пIулъын, къэбзэныгъэм улъыплъэн фае, ау о зэрэпIоу зэкIэ хъурэп, анахь зыфэсакъыжьыгъэу зыIохэрэри къэсымаджэх.

ПсынкIэу зэпахырэ узым узэрэпэшIуекIощт закъор вакцинэр зыхябгъалъхьэмэ ары. Къэбар нэпцIыхэр зэрэзэрахьэрэм ыпкъ къикIыкIэ цIыфхэр мэщынэх. ХьакIэмыз Айщэт щэпIэ сеть анахь инэу щыIэхэм ащыщэу «Пятерочка» зыфиIорэм ипащэу Iоф ешIэ. Вакцинэр рэспубликэм къащагъэу зызэхехым,  емыджэнджэшэу аригъэшIынэу кIуагъэ.

— Тучаныр цIыф кIуапIэу щыт, Адыгеим имызакъоу, Урысыем къикIыгъэ зекIохэри бэу къычIэхьэх. Сымаджэ хъугъэхэм къинэу алъэгъурэр, хъужьыгъэхэми, псауныгъэм иягъэ зэрэригъэкIырэр сэшIэти, прививкэ язгъэшIыгъ. Апэрэ мафэм къызыхалъхьэгъэ Iэр тIэкIу узыгъэ, ащ нэмыкIыкIэ зи къызыхэсшIагъэп. Узыр къыспымыхьанымкIэ джы сыгукIэ нахь гупсэф  сыхъугъ, унэм ис нахьыжъхэми зэпахырэ узыр джы афэсхьыщтэп. Сэ зэрэслъытэрэмкIэ, прививкэр ябгъэшIымэ нахь тэрэз,  — еIо Айщэт.