Гъэстыныпхъэ шхъуантIэр аIэкIэгъэхьэгъэным пае

ФедерациемкIэ Советым ивице-спикерэу, партиеу «Единэ Россием» и Генсовет и Секретарэу Андрей Турчакрэ УФ-м и Правительствэ и Тхьаматэ игуадзэу Александр Новакрэ бэдзэогъум и 26-м зэды­ря­Iэ­гъэ зэIукIэгъум социальнэ газификацием ипрограммэ щытегущы­Iагъэх.

— Мы программэм игугъу къэтшIыгъ, ау джыри аштагъэп. Урысыем и Президент мэ­лылъфэгъум и 21-м къышIыгъэ Джэпсалъэм ыуж гъэстыныпхъэ шхъуантIэр участкэхэм ящэ­лIэгъэным цIыфхэм яахъщэ пэIуагъэхьагъ. А мылъкур афызэкIэдгъэкIожьынэу предложение къэтхьыгъ ыкIи УФ-м и Правительствэ ащ къызэрэдыригъэштагъэмкIэ тыфэраз, — къыIуагъ Андрей Турчак.

УФ-м иминистрэхэм я Кабинет газрыкIуапIэм (оборудованием) игъэтIылъын пэIуагъэ­хьэгъэ ахъщэр цIыфхэм афызэкIигъэкIожьыным фэхьазыр.

— Социальнэ газификацием ишапхъэ кIуачIэ иIэ зыхъугъэр гъэтхапэр ары, къэралыгъом ипащэ партием ипредложение зыдыригъэштагъэр мэлылъфэгъур ары. Арышъ, мэлылъфэгъум и 21-м къыщегъэжьагъэу шэпхъэ базэр къызщыдэкIыгъэм нэс, зэзэгъыныгъэ адэзышIыгъэ цIыфхэм агъэкIодыгъэ ахъщэр къызэкIагъэкIожьын амал ятыгъэн фае, — къыIуагъ Александр Новак.

Андрей Турчак къызэрэхи­гъэщыгъэмкIэ, Урысыем итых псэупIэхэр зы урамым тет унэ­хэм ащыщхэм гъэстыныпхъэ шхъуантIэр аIэкIахьэу, адрэхэм ямыIэу. УФ-м и Правительствэ зэхигъэуцогъэ программэмкIэ 2022-рэ илъэсым ыкIэм нэс унэгъо миллиони 4 фэдизмэ газыр алъыIэсыщт.

Шъугу къэдгъэкIыжьын, УФ-м и Президентэу Владимир Пу­тиныр ыпкIэ хэмылъэу гъэстыныпхъэ шхъуантIэр участкэхэм ящэлIэгъэным фэгъэхьыгъэ хэ­бзэгъэуцугъэм мэкъуогъум и 11-м кIэтхагъ. Фракциеу «Единэ Россием» игъэтэрэзыжьынхэр ащ къыдыхэлъытагъэх. Гази­фикацием иапэрэ едзыгъо 2023-рэ илъэсым нэс агъэцэкIэщт, ятIонэрэр — 2030-м нэс зэшIо­хыгъэ хъущт. ГазрыкIуапIэр чIыгу Iахьым игъунапкъэ ещэлIэгъэнымкIэ пшъэдэкIыжь зы­хьыщтыр зыкI операторыр ары. «Зы шъхьангъупчъэкIэ» за­джэхэрэ шIыкIэр къызфагъэфедэзэ цIыфхэр зэзэгъыныгъэм кIэтхэнхэ алъэкIыщт. Ащ фэдэ екIолIакIэм IофшIэныр нахь къыгъэпсынкIэщт.