Бжыхьасэхэм яIухыжьын аухы

Тыгъуасэ, бэдзэогъум и 26-м, АР-м мэкъу-мэщымкIэ и Министерствэ тызэрэщигъэгъозагъэмкIэ, бжыхьэсэ лэжьыгъэ гектар 107171-у Адыгеим ичIыгулэжьхэм халъхьагъэм щыщэу Iуахыжьынэу къафэнэгъагъэр 6256-р ары ныIэп. ГурытымкIэ лъытагъэу, коц гектарым центнер 47,3-рэ къырахы.

Хьэр гектар 12564-р Iуахыжьыгъах, гурытымкIэ лъытагъэу, зы гектарым центнер 47,3-рэ къырахызэ тонн 58271-рэ аугъои­жьыгъ.

Коцымрэ рапсымрэ мы уахътэм зыуж итхэр. ПстэумкIи коц гектар 94380-у халъхьэгъагъэм щыщэу 88237-р аIожьыгъах. Гуры­тымкIэ лъытагъэу, центнер 47,3-рэ зы гектарым къеты, тонн 417700-рэ къаугъоижьыгъ.

Анахьыбэу къызщырахырэр Кощхьэблэ ыкIи Красногвардейскэ районхэр ары. Ахэм япчъагъэхэр мы уахътэм зэфэдизых, гурытымкIэ центнер 54-рэ якоц хьасэхэм къаты.

МакIэу къафэнагъ ыкIи анахьыбэ къизыхыхэрэм ащыщых Шэ­уджэн районым ичIыгулэжьхэр. Гектар 14370-рэ ахэм коцым рагъэубытыгъагъ, тыгъуасэ аIо­жьыгъэр 14050-рэ хъущтыгъ, гурытымкIэ лъытагъэу, центнер 51-рэ зы гектарым къырахы.

Ащ ыуж макIэу ит Джэджэ районыр. Мыщ ичIыгулэжьхэм коцым анахьыбэу рагъэубыты­гъагъ, пстэумкIи гектар 22974-рэ яIагъ. Ащ щыщэу тыгъуасэ къа­фэнэгъагъэр гектар 200 икъущтыгъэп, зым центнер 49,2-рэ къырахы.

Чылапхъэ ашIыщт рапс гектар 8357-у республикэм щырапхъыгъа­гъэм щыщэу 7753-р Iуахы­жьыгъ, гурытымкIэ лъытагъэу, центнер 20 гектарым къырахы.

ЧIыгулэжьхэм бжыхьасэхэм адакIоу гъатхэм халъхьэгъэ лэ­жьы­­гъэр Iуихыжьынэу езыгъэжьагъэхэри ахэтых. ГущыIэм пае, Кощхьэблэ ыкIи Красногвардейскэ районхэм гъэтхэсэ хьэр ащыIуа­хыжьы. Мы район дэдэхэм ыкIи Джэджэ, Мыекъопэ районхэм зэнтхъым иIожьын ащырагъэ­жьагъ.

ХЪУТ Нэфсэт.