Зыхябгъалъхьэмэ нахьышIу

Коронавирусым пэшIуекIорэ вакцинэр зыхязыгъэлъхьагъэхэм ащыщ АР-м и Лъэпкъ тхылъеджапIэ ипащэу Къыкъ Бэллэ.

— ЩыIэныгъэм чIыпIэу тызыригъэуцуа­гъэм елъытыгъэу сэ сшъхьэкIэ вакцинэр зыхязгъэлъхьаным игупшысэ сыкъыфэ­кIуагъ. Сыда пIомэ, сызипэщэ коллективыр ины, зэкIэмкIи нэбгырэ 90-рэ мэхъу. Ащ нэмыкIэу, тхылъеджапIэм цIыфэу къыт­факIорэр, узыр къызпыпхын плъэкIынэу къычIахьэрэр бэ. Апэрэ Iахьыр мэлылъфэгъум, ятIонэрэр жъоныгъуакIэм язгъэшIыгъ. Дэгъоу къысэзэгъыгъ, зыпари къин сигъэлъэгъугъэп. Укол ашIыгъэ чIыпIэр тIэкIу узыгъэ, нэмыкIыкIэ гумэкI сыхэтыгъэп. Ащ лъапсэ фэхъун ылъэкIыгъэр гриппым пае бжыхьэм прививкэ зызэ­рязгъэшIыгъэр арыщтын. Коронавирусыр къысэузыгъэп, арэу щытми, сиIофшIэгъу­хэми сэри илъэс къэс гриппым пэшIуекIорэ прививкэр зыхятэгъалъхьэ. Сыда пIомэ, ыпшъэкIэ къызэрэщысIуагъэу, тхылъеджапIэм цIыфыбэ къычIэхьэ, ахэм сымаджэхэри ахэтых. Ащ фэдэхэм защы­тыухъумэным фэшI пэшIорыгъэшъэу илъэс къэс вакцинациер тиIофшIапIэкIэ тэкIу.

Сызипэщэ тхылъеджапIэм иIофышIэхэм садэгущыIэ, агурысэгъаIо прививкэ зарагъэшIымэ зэрэнахьышIур. Мы мафэм ехъулIэу процент 50-м шIокIэу вакцинэр зыхарагъэлъхьагъ. Апэдэдэ мы узыр къы­зежьэм бэ сымэджагъэр, къины къызы­фэхъугъэхэр мымакIэу ахэтых. СиIофшIэгъухэу вакцинэр зыхязыгъэлъхьагъэхэм зэкIэми къязэгъыгъ, тхьаусыхагъэ къахэ­кIыгъэп.

ТхылъеджапIэм иIофышIэхэм ямызакъоу, цIыфхэм сыкъяджэ сшIоигъу шIокI имы­Iэу вакцинэр зыхарагъэлъхьанэу. Ежь­хэм ямызакъоу, яIахьыл гупсэхэм ящыIэныгъэ къаухъумэнэу сыфай. Мыр уз щы­нагъоу щыт, бэ илIыкIырэр. Щысэ къэпхьын плъэкIыщт сымэджэщым иврачхэу, иIофышIэхэу коронавирусым бэ зэрекIодылIагъэхэр. Узфэсакъыжьын, о уимыза­къоу, Iоф зыдапшIэхэрэми, уиIахьылхэми, узхахьэу, узхэкIыхэрэми уафэсакъын фае.

КIАРЭ Фатим.