Коронавирусым пэшIуекIорэ вакцинэр зыхязыгъэлъхьагъэхэм ащыщ АР-м и Лъэпкъ тхылъеджапIэ ипащэу Къыкъ Бэллэ.
—ЩыIэныгъэм чIыпIэу тызыригъэуцуагъэм елъытыгъэу сэ сшъхьэкIэ ушэтынхэр сшIыхи, вакцинэр зыхязгъэлъхьаным сыкъыфэкIуагъ. Сыда пIомэ, сызипэщэ коллективыр ины, зэкIэмкIи нэбгырэ 90-рэ мэхъу. Ащ нэмыкIэу тхылъеджапIэм цIыфэу къытфакIохэрэр, узыр къызпыпхын плъэкIынэу къычIахьэрэр бэ. Арышъ, сэ сшъхьэкIэ мы Iофым сишъыпкъэу ыуж сихьи, вакцинэр зыхязгъэлъхьагъ. Апэрэ Iахьыр мэлылъфэгъум, ятIонэрэр жъоныгъуакIэм язгъэшIыгъ. Дэгъоу къысэзэгъыгъ, зыпари къин сигъэлъэгъугъэп. Укол ашIыгъэ чIыпIэр тIэкIу узыгъ, нэмыкIыкIэ гумэкI сыхэтыгъэп. Ащ лъапсэ фэхъун ылъэкIыгъэр гриппым пае бжыхьэм прививкэ зызэрязгъэшIыгъэр арыщтын. Коронавирусыр къысэузыгъэу щытэп, арэу щытми сиIофшIэгъухэми сэри илъэс къэс гриппым пэшIуекIорэ прививкэр зыхятэгъалъхьэ. Сыда пIомэ, ыпшъэкIэ къызэрэсIуагъэу тхылъеджапIэм цIыфыбэ къычIахьэ, ахэм сымаджэхэри ахэтых. Ащ фэдэхэм защытыухъумэным фэшI пэшIорыгъэшъэу илъэс къэс вакцинациер тиIофшIапIэкIэ тэкIу.
Сызипэщэ тхылъеджапIэм иIофышIэхэм садэгущыIэ, агурысэгъаIо прививкэ зырагъэшIымэ зэрэнахьышIур. Мы мафэм ехъулIэу процент 50-м шIокIэу вакцинэр ахалъхьагъ. Апэдэдэ мы узыр къызежьэм бэ сымэджагъэр, къины зылъэгъугъэхэр мымакIу ахэтых. СиIофшIэгъухэу вакцинэр зыхязыгъэлъхьагъэхэм зэкIэми къязэгъыгъ, тхьаусыхагъэу зы нэбгыри къыхэкIыгъэп.
ТхылъеджапIэм иIофышIэхэм ямызакъоу цIыфхэм сыкъяджэ сшIоигъу шIокI имыIэу вакцинэр зыхарагъэлъхьанэу. Ежьхэм ямызакъоу яIахьыл гупсэхэм ящыIэныгъэ къаухъумэнэу сыфай. Сыда пIомэ мыр уз щынагъоу щыт, бэ илIыкIырэр. Анахьэу щысэ къэпхьын плъэкIыщт сымэджэщым иврачхэу, иIофышIэхэу коронавирусым бэ зэрекIодылIагъэхэр. Ахэм язакъоми, узфэсакъыжьын, о уимызакъоу Iоф зыдапшIэхэрэми, уиIахьылхэми, узхахьэу узхэкIыхэрэми уафэсакъын фае.