УшэтыпI

Зэрэунагъоу гукIэгъу лъапсэу
О ущэIэфэ уфэлэжьагъ,
Амалэу тиIэм  тышъхьамысыгъэу
Узы мэхъаджэр къыпфырикъугъ.

КъытэхъулIагъэр тшIошъи мыхъугъэу
Къиным игъогу тытеуцуагъ.
СыщыI ерагъэу, сшъхьэ унэзагъэу,
Къысаджэрэр зэхэсымыхэу.

СыдэкIыгъ зымафэ джэуап сылъыхъоу,
ТIэкIу жьы къабзэм сыхэтынэу,
Сигупшысэхэр зэзгъэфэнхэу,
Стелъ хъугъэ онтэгъугъэм
Икуугъэ зэзгъэшIэнэу.

Мафэр кIако — бжыхьэр гомыIу,
Жьыбгъэ макIэр —тыгъэжь чъыI,
Мэз шIуцIэр — шъэф бзэмыIу,
ПсыуцупIэр — гъунэ зимыI,
Рэхьатыгъо тыди щымыI.

Ашъыу, хъунэп, сыгуи згъэкIодынэп,
ГъашIэр зиIэшIагъэм къысфидэнэп,
ЛIыгъэу схэлъыгъэм сыфыреплъэкIын,
Сигулъытэми зэ сяушъыижьын.

Мы дунаим изы пкъыгъоу
Псэ зыпытмэ сэ сащыщ.
Сызыхэтыр гъэшIэгъонэу,
Тхьэм ишIушIэ мыухыжь.

ЯгукIэгъу сыщыгугъэу
Силъэпкъэгъумэ сяупчIын,
Хьылъэу стелъмэ яджэуапхэр
КъысаIонэу къычIэкIын.

Зэрамыку Адылджэрый.