Зэфэхьысыжьхэр

Бэдзэогъур къызихьагъэм къыщегъэжьагъэу шъолъыр гъэIорышIапIэмкIэ Гупчэм гъогогъу 1593-рэ зыкъыфагъэзагъ, ащ щыщэу 718-р зэшIуахыгъ, 875-м изэшIохын ыкIэм фэкIо.

Адыгеим ицIыфхэр анахь зыгъэгумэкIыхэрэ упчIэхэр шъо­лъыр гъэIорышIапIэмкIэ Гупчэм испециалистхэм агъэунэфыгъэх. Коронавирусым пэшIуекIогъэным пае вакцинэ зыхэплъхьан зэрэфаер, ар чIыпIэхэу зыщашIхэрэр къизыIотыкIхэрэ видеороликхэр социальнэ сетьхэм къарагъэхьагъэх. Прививкэм ыуж цIыфым къегоон ылъэкIыщтхэр, аллергие зиIэхэм ашIэн фаехэр ащ къыщыраIотыкIыгъэх.

АР-м псауныгъэр къэухъумэгъэнымкIэ и Министерствэ шъолъыр гъэIорышIапIэмкIэ Гупчэр игъусэу цифровой IэпыIэгъум иIофшIэн рагъэжьагъ. Ащ ишIуагъэкIэ диспансеризацием фэгъэхьыгъэхэ къэбархэр республикэм щыпсэухэрэм алъэIэсых.

АР-м гъэсэныгъэмрэ шIэныгъэмрэкIэ и Министерствэрэ шъолъыр гъэIорышIапIэмкIэ Гупчэмрэ джащ фэдэу онлайн-сервис къаугупшысыгъ. Ащ ишIуагъэкIэ сабыир кIэлэцIыкIу IыгъыпIэм ептыным пае пшIэнхэ фаехэр цIыфхэм нахь къагурэIо.

Республикэм цIыфхэу исхэр зыгъэгумэкIыхэрэм ядэгъэзы­жьынкIэ анахь чанэу Iоф зы­шIэрэ муниципалитетхэмрэ министерствэхэмрэ шъолъыр гъэIорышIапIэмкIэ Гупчэм ыгъэ­нэфагъэх. Мэкъуогъу мазэр пштэмэ, АР-м мэкъу-мэщымкIэ и Министерствэ, АР-м псэолъэ­шIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ, АР-м IофшIэнымрэ, социальнэ хэхъоныгъэмрэкIэ и Министерствэ апэ итыгъэх. Муниципальнэ зыгъэIорышIэжьынымкIэ анахь дэгъоу Iоф зышIагъэу агъэнэфагъэхэр Яблоновскэ къэлэ псэупIэр, Кощхьэблэ ыкIи Красногвардейскэ районхэр арых. МуниципалитетхэмкIэ Мыекъопэ, Красногвардейскэ районыр ыкIи Адыгэкъалэ къахагъэщыгъэх.

ТхьамэфитIум къыкIоцI рес­публикэм ис цIыфхэр зыгъэгумэкIыхэрэр зэхафыгъэх. Ахэм ащыщэу Красногвардейскэм щыпсэурэ хъулъфыгъэм илъэIу агъэцэкIагъ. Ащ къызэриIуагъэм­кIэ, телефон пкъэум гъэцэ­кIэжьын ищыкIэгъагъ, пкъэур гъогум къытефэнкIэ щынагъо щыIагъ, ащ кIэлэцIыкIухэр щэджэгух. Муниципальнэ гъэIорышIапIэм и Гупчэ лъэIур къы­лъэгъугъ ыкIи Красногвардейскэ районым иадминистрацие лъигъэIэсыжьыгъ. Мы мэфэ дэдэм «Ростелекомым» иIофышIэхэр чIыпIэм кIуагъэх ыкIи агъэцэкIэжьыгъ.

Джащ фэдэу Красногвардейскэ районым щыщ бзылъфы­гъэу Мыекъуапэ операцие ща­шIынэу щытым IэпыIэгъу фэхъугъэх.

Илъэс 82-рэ зыныбжь Валентина Яценкэм игъунэгъу бзылъфыгъэм закъыфигъэзагъ. Мые­къуапэ кIоным пае, зыныбжь хэкIотэгъэ бзылъфыгъэм фэгъэ­кIотэнхэр иIэщтхэмэ къыкIэу­пчIагъ. Ар апэрэу зылъэгъугъэр муниципальнэ гъэпсыкIэ зиIэ «Красногвардейскэ район» зыфиIорэм имуниципальнэ гъэIорышIэпIэ Гупч. ГумэкIыгъом идэгъэзыжьын район администрациемрэ цIыфхэм социальнэ IэпыIэгъу ягъэгъотыгъэнымкIэ Комплекснэ гупчэмрэ зэшIуа­хыгъ. ФэгъэкIотэнхэр иIэхэу бзылъфыгъэр Мыекъуапэ къащагъ ыкIи операциер пэкIэкIымэ материальнэ IэпыIэгъу къыратыным пае тхылъхэр ыгъэхьазырынхэу къыраIуагъ.

ДЕЛЭКЪО Анет.