Адэбз узым пэшIуекIох

Шъолъыр проектэу «Адэбз узым пэуцужьыгъэныр» зыфиIорэм къыдыхэлъытагъэу адэбз уз зиIэхэм хэушъхьафыкIыгъэ медицинэ IэпыIэгъу арагъэгъотыным фэшI мы мафэхэм къалэу Ростов-на-Дону адэбз узхэмкIэ и Лъэпкъ медицинэ ушэтыпIэ гупчэ икураторхэр Адыгеим къырагъэблэгъагъэх.

Бэдзэогъум и 27-м къыщегъэжьагъэу и 30-м нэс ахэр республикэм щыIэнхэу агъэнафэ. Адэбз уз зиIэхэм агъотырэ медицинэ IэпыIэгъур зэрагъэлъэгъуныр, ахэм уасэ къафашIыныр ары пшъэрылъ шъхьаIэр.

Адыгэ Республикэм псауныгъэр къэухъумэгъэнымкIэ и Министерствэ къызэрэщаIуагъэмкIэ, Адыгэ республикэ клиническэ онкологическэ диспансерым, Адыгэкъэлэ сымэджэщэу К.М. Батмэным ыцIэ зыхьырэм, Кощхьэблэ сымэджэщым хьакIэхэр ащыIэщтых.
— Мыщ фэдэ зэIукIэгъухэм шIуагъэ къаты, специалистхэм язэдэлэжьэныгъэ нахь пытэ мэхъу, адэбз узхэм яIэзэнхэмкIэ аужырэ шапхъэхэм адиштэрэ шIыкIэхэр къаIэкIэхьэх, — еIо Iэзэн-пэшIорыгъэшъ IэпыIэгъу цIыфхэм ягъэгъотыгъэнымкIэ отделением ипащэу Къушъхьэ Саниет.

Адэбз узхэм апэшIуекIогъэныр УФ-м и Президент пшъэрылъ шъхьаIэу къыгъэуцухэрэм ащыщ. 2024-рэ илъэсым нэс мы узым илIыкIыхэрэр нахь макIэ ашIын мурад зыдаIыгъ. Непэрэ мафэм ехъулIэу мы узыр зиIэхэм япроцент 62-м ар пасэу къыхагъэщын зэралъэ­кIыгъэм ишIуагъэкIэ, Iэзэн Iофтхьабзэхэм шIуагъэ къахьыным яцыхьэ телъ.

ДЕЛЭКЪО Анет.