Адыгеим щашIыщт гугъэр арымэ…

ЗэIухыгъэ шIыкIэм тет физкультурнэ-псауныгъэ гъэпытэпIэ комплекси 100 Урысыем ишъолъыр 78-мэ ащагъэпсыщт. Проектым игъэцэкIэн пэIухьащт сомэ миллион 20 Адыгеим къыфатIупщыгъ.

АР-м физическэ культурэмкIэ ыкIи спортымкIэ и Комитет къызэрэщаIуагъэмкIэ, федеральнэ бюджетым къыхэхыгъэ мылъкумкIэ спорт инфраструктурэм ипсэуалъэхэр зэтырагъэпсыхьащтых.

Ведомствэм къызэритырэмкIэ, ахъщэу къатIупщыгъэр пэ­Iуа­гъэхьащт ыпшъэкIэ зигугъу къэтшIыгъэ комплексым фэдэ къуаджэу Улапэ щышIыгъэным. Къэралыгъо программэу «Физи­ческэ культурэм ыкIи спортым хэхъоныгъэ ашIыныр» зыфиIо­рэм къыдыхэлъытагъэу спорт псэуалъэр агъэпсыщт, шъолъырым имылъкуи ащ хэлъыщт.

— Спортым хэхъоныгъэ ышIы­­ным ыкIи ащ фытегъэ­псыхьэгъэ псэолъакIэхэр гъэ­псыгъэн­хэм Адыгеим мэхьанэшхо щыраты. Урысыем и Президентэу Владимир Путиным пшъэрылъ шъхьаIэу къыгъэуцугъэхэм ащыщ спорт жъугъэм тикъэралыгъо зыщиушъомбгъуныр. Федеральнэ IэпыIэгъум ишIуагъэкIэ физическэ культурэм ыкIи спортым республикэм хэхъоныгъэ щашIы, зипсауныгъэ зыгъэпытэхэрэм япчъагъэ нахьыбэ мэхъу, — къыIуагъ партиеу «Единэ Россием» ишъолъыр къутамэ и Секретарэу, Адыгеим и ЛIы­шъхьэу КъумпIыл Мурат.

Псэуалъэм ишIын пэIухьащт мылъкур республикэм къыIэ­кIэхьанымкIэ Iофышхо ышIагъ УФ-м и Къэралыгъо Думэ идепутатэу Владислав Резник.

— 2030-рэ илъэсым ехъулIэу къэралыгъом щыпсэухэрэм япроцент 70-р физическэ культурэм ыкIи спортым хэщэгъэнхэ фаеу пшъэрылъ щыт. Ар гъэцэкIэгъэным пае тикъалэхэм, тикъуаджэхэм физкультурнэ-псауныгъэ гъэпытэпIэ комплексхэр ащытшIынхэ ыкIи ахэр зэрифэшъуашэу зэтедгъэпсыхьанхэ фае, — къы­Iуагъ Владислав Резник.