«Вакцинэр зыхядгъалъхьэмэ ишIуагъэ къэкIощт»

Арэущтэу зылъытэрэмэ ащыщ Мыекъопэ медицинэ колледжым ипащэу Алексей Самоквитовыр.

— Дунаир зэлъызыубытыгъэ пандемием текIон зылъэкIыщт закъоу мы уахътэм щыIэр вакцинациер ары. Сэ сшъхьэкIэ сиIофшIэн епхыгъэу цIыфыбэмэ ренэу сахэт, узыр къызыспыхьэкIэ, ахэмкIэ сэ щынагъо сэхъу. Арышъ, вакцинациер хэкIыпIэу слъэгъуи, прививкэм иапэрэ хэлъхьагъу язгъэшIыгъ, ятIонэрэр къэкIощт тхьамафэм къысфашIыщт. СипсауныгъэкIэ къысэхьылъэкIыгъэп, вакцинэр къызхалъхьэгъэ чIыпIэр мэфитIо узыгъэ ныIэп, — къы­Iуагъ ащ.

Джащ фэдэу, тигущыIэгъу къызэрэхигъэщыгъэмкIэ, «уз мэхъа­джэм» тыпэуцужьыным фэшI «коллективный иммунитет» зыфаIорэр тиIэ хъуным тыкъыфэкIон фае. Ащ тыкъыфэзыщэщтыр вакцинациер ары. Непэрэ гумэкIыгъом идэгъэзыжьынкIэ вакцинэм ишIуагъэ къэ­кIощтэу Алексей Самоквитовым елъытэ.