Шверикас Вячеслав Николай ыкъор

Бэрэ хьылъэу зэсымэджэ нэуж илъэс 61-м итэу дунаим ехыжьыгъ Шверикас Вячеслав Николай ыкъор. 2004-рэ илъэсым къыщегъэжьагъэу 2017-рэ илъэсым нэс Урысые Федерацием и Федеральнэ ЗэIукIэ ФедерациемкIэ и Совет хэтыгъ, Адыгэ Респуб­ликэм икъэралыгъо хабзэ игъэцэкIэкIо къулыкъу илIыкIоу ар щытыгъ, партиеу «Единэ Россием» хэтыгъ.


В.Н. Шверикас 1961-рэ илъэсым мэзаем и 3-м къэ­хъугъ. 1984-рэ илъэсым А. А. Ждановым ыцIэкIэ щыт Ленинград къэралыгъо университетым иэкономическэ факультет, 2005-рэ илъэсым Урысые Федерацием IэкIыб къэрал IофхэмкIэ и Министерствэ и Дипломатическэ академие къыухыгъэх.

Ленинград къэралыгъо университетыр къызеухым ыуж производствэм щылэжьагъ, Санкт-Петербург игъэцэкIэкIо хабзэ икъулыкъухэм Iоф ащишIагъ, Урысые Федерацием и Президент и Администрацие и ГъэIорышIэпIэ шъхьаIэ иотдел ипэщагъ. Джащ фэдэу Урысые Федерацием и Правительствэ и Аппарат ыкIи Урысые Федерацием финансхэмкIэ и Министерствэ Iоф ащишIагъ.

2004-рэ илъэсым къыщегъэжьагъэу 2017-рэ илъэсым нэс Урысые Федерацием Адыгэ Республикэм ыцIэкIэ исенатор иполномочиехэр ыгъэцакIэщтыгъэх. Финанс рынкэхэмкIэ ыкIи ахъщэм игъэзекIонкIэ Федерацием и Совет и Комитет хэтыгъ, информационнэ политикэмкIэ Федерацием и Совет и Комиссие, Федерацием и Совет иIофшIэн зэрэкIорэм лъы­плъэгъэнымкIэ комиссием, экономикэ политикэмкIэ Урысые Федерацием и Комитет ахэтыгъ.

Iофым ыгукIэ зэрэфэщагъэм, шIэныгъэ куу зэриIэм, чыжьэу зэрэплъэрэм яшIуагъэкIэ Адыгэ Республикэм федеральнэ къу­лыкъухэм зэдэлэжьэныгъэ адыриIэным иIахь хишIыхьагъ, уахъ­тэм къыгъэуцурэ зигъо Iофыгъуабэхэм язэшIохынкIэ гухэлъхэу яIэхэр пхыращынхэмкIэ ишIуагъэ къэкIуагъ.

Вячеслав Николай ыкъом Урысые Федерацием и Федеральнэ ЗэIукIэ ФедерациемкIэ и Совет зыхэтым Адыгеим ифедэхэр къыухъумэхэзэ, тиреспубликэ исоциальнэ-экономикэ хэхъоныгъэ, проектышхохэу республикэм щырахъухьагъэхэр пхырыщыгъэнхэмкIэ ишIогъэшхо къыгъэкIуагъ.

Общественностым лъытэныгъэшхо ащ фишIыщтыгъ, хабзэм икъулыкъу зэфэшъхьафхэм шIуагъэ къэзытырэ зэдэгущыIэгъу­хэр адишIынхэ, теубытагъэ зыхэлъ унашъохэр ыштэнхэ ылъэ­кIыщтыгъ, цIыфхэмкIэ нэгуихыгъэу щытыгъ, щыIэныгъэм кIэгушIущтыгъ.

Шверикас Вячеслав Николай ыкъом игупсэхэм ыкIи къыпэблагъэхэм гухэкIышхо тщыхъоу тафэтхьаусыхэ къинэу къафыкъокIыгъэм пае.

В.Н. Шверикас игупсэхэм, къыпэблагъэхэм, Iоф дэзышIагъэ­хэм, зэкIэ зышIэгъэ пстэуми шIукIэ агу илъыщт.

М. Къ. КъумпIыл, В. И. Нарожный, А. К. ТхьакIущын, О. В. Селезнев, М. Къ. Хъопсэрыкъу, В. М. Резник, М. Р. Хьа­саныкъу, Г. А. Митрофанов, В. П. Свеженец, В. Д. Сапый, Н. С. Широкова, А. В. Наролин