ХъутIыжъ Тимур: «Узыр зэкIэдгъэкIоным ар иамал шъхьаI»

Илъэсым ехъугъ мы зэпахырэ узым — коронавирусым — цIыфхэр зызэридзэ­хэ­рэр, тищыIэныгъэ ар къызыхэхьагъэр.

Шъыпкъэр пIощтмэ, апэрэ къэбархэу ащ фэгъэхьыгъэу къытлъыIэсыщтыгъэхэм мэхьанэшхо яттыщтыгъэп, ар зыщыхъурэр чыжьэу, тикъэ­ралыгъо къынэмысыщтэу къытщыхъу­щтыгъ. Ау тэ тызэрэгугъэу хъу­гъэп, зэрэдунаеу ащ зэлъикIугъ, гумэкIыгъуабэ къызыдихьыгъ. ТинэIосэ, тигупсэ, республикэм дэгъоу щашIэрэ нэбгырэ пчъагъэмэ ящыIэныгъэ а узым аIихыгъ, ныбжьыкIэу, «ищыIэныгъэ ыпэкIэ къэт» зыфаIохэрэм афэдэу макIэп дунаим ехыжьыгъэр IэпыIэгъу афэхъунхэ амылъэкIэу.

Мы лъэхъаным узыр зэкIэкIуагъ, сымаджэхэрэм япчъагъи къыщыкIагъ, ау ащ ищынагъо джыри тшъхьарыт, узыр зыми «кIуагъэп», ар «къытхэт». Специалистхэм къызэрэхагъэщырэмкIэ, узыр зэкIэкIоным, ищынагъо нахь макIэ хъуным фэшI «коллективный иммунитет» зыфаIорэр тиIэн, нэмыкIэу къэпIон хъумэ, вак­ци­нэу ащ пэуцужьыхэрэр нахьыбэм зыхарагъэлъхьан фае.

Нэбгырэ пэпчъ ар ежь иIоф, ау зыщыдгъэгъупшэ хъущтэп типсауныгъэ тэр-тэрэуи тыфэсакъын, къэтыухъумэн зэрэфаер. ЕтIани тыгу къэтэжъугъэгъэкIыжь лъэхъэнэ зэфэ­шъхьафхэм дунаим зэпахырэ узыбэ къызэрэщекIокIыгъэр. Ахэм ащыщхэр щыIагъэхэми бэшIагъэу тщыгъупшэ­жьыгъэх, «Iашэу» зэрапэуцужьыгъэ­хэри тэшIэ — вакцинэр ары.

Мы Iофым еплъыкIэу фыриIэр зэдгъашIэ тшIоигъоу гущыIэгъу тыфэ­хъугъ Адыгэ республикэ клиническэ сымэджэщым травматологиемкIэ иот­деление ипащэу ХъутIыжъ Тимур.

— Вакцинэр зыхязгъэлъхьан зэрэфаем бэрэ сегупшысагъэп, язгъэ­шIыгъ, къини къысщыхъугъэп, цIыфхэм ар зыхарагъэлъхьан фаеуи сэлъытэ. Анахьэу ар зышIэн фаехэр ныбжь хэкIотагъэ зиIэхэр, иIофшIэн епхы­гъэу цIыфыбэмэ ахэхьан фаеу хъухэрэр ары. НэмыкIэу къэпIон хъумэ, «группа риска» зыфаIохэрэм ахахьэхэрэм. Тызэсэгъэ псэукIэм къыфэдгъэзэжьын тлъэкIыным, узыр зэкIэдгъэкIоным ар изы амал, ары пакIошъ, иамал шъхьаI, — къыIуагъ ХъутIыжъ Тимур.

ЖакIэмыкъо Аминэт.