ЫпкIэ хэмылъэу газыр аIэкIагъэхьащт

Партиеу «Единая Россия» зыфиIорэр сабыибэ зэрыс унагъохэм, сэ­­къатныгъэ зиIэхэм ыкIи пенсионерхэм ыпкIэ хэмылъэу газыр аIэ­кIэгъэ­хьэгъэ­нымкIэ шъолъырхэм IэпыIэгъу афэхъущт.

Партием а законыр пхырыщыгъэным ынаIэ тыригъэтыщт, ащкIэ шъолъырхэм япащэхэри игъусэщтых. «Газпромри» щэгугъы ахэм яшIуагъэ къагъэкIоным. Сессиеу «Инфраструктурные проекты в регионах — драйвер роста» зыфиIоу Дунэе экономическэ форумым тегъэпсыхьа­гъэу зэхащэгъагъэм а Iофыр зэшIохыгъэ зэрэхъущт шIыкIэ-амалхэм щатегущыIэгъагъэх.

«Мы документым бэшIагъэ цIыфхэр къызежэхэрэр. «Единый оператор газификации» зыфи­Iорэм диштэу, инфраструктурэм ишIын епхыгъэ Iофхэр зэкIэ шъолъырхэр ягъусэхэу зэшIуа­хыщтых. Пшъэрылъыбэ зыгъэцэ­кIэрэ гупчэмрэ «Къэралыгъо фэIо-фашIэхэр» зыфиIорэмрэ зэгъусэхэу лъэIу тхылъхэм язэ­хэфынкIэ IофшIэн гъэнэфагъэ агъэцэкIэщт», — къыхигъэщыгъ партиеу «Единэ Россием» и Генеральнэ совет исекретарэу Андрей Турчак.

Социальнэ шIыкIэм тетэу газыр аIэкIэгъэхьэгъэным ипрограммэ хэгъэгумкIэ унэ миллионитIу фэдиз къыхеубытэ. Гущы­Iэм пае, Челябинскэ хэкумкIэ мин 80 фэдиз, къыкIигъэтхъыгъ шъолъырым ипащэу, «Единэ Россием» ишъолъыр къутамэ исекретарэу Алексей Текслер. Мыщ дэжьым къыхэгъэщыгъэн фае: бэдзэогъум и 1-м къыщегъэжьагъэу социальнэу мыухъу­мэгъэ цIыф куп гъэнэфагъэхэм газыр аIэкIэгъэхьэгъэнымкIэ про­граммэм игъэцэкIэн аублэщт.

Мы программэм къызэрэди­лъытэрэмкIэ, зизакъоу псэурэ пенсионерхэм, кIэлэцIыкIу сэкъатхэр зиIэхэм, джащ фэдэу щыIэныгъэм чIыпIэ зэжъу ри­гъэу­цогъэ унагъохэм газыр унэм ращэнымкIэ ыкIи ащкIэ ящыкIэгъэ Iэмэ-псымэхэр аIэкIэгъэ­хьэгъэнхэмкIэ тынаIэ атетыщт», — къыIуагъ Алексей Текслер.
Шъолъыр зэфэшъхьафхэм япа­щэхэм зыкIыныгъэ ахэлъэу хагъэунэфыкIы цIыфхэм газыр аIэкIахьэмэ, экономикэмкIи ишIуа­гъэ къызэрэкIощтыр. Гущы­Iэм пае, Мурманскэ хэкум ком­мунальнэ фэIо-фашIэхэм апае цIыфхэм ахъщэу атырэм къыкIичыщт, джащ фэдэу перерабатывающэ промышленностым нахь хэхъоныгъэ ин ышIыщт, къыхигъэщыгъ Андрей Чибис.

«ЭнергетикэмкIэ Министерст­вэм, «Газпромым» Iофэу адатшIэрэм ишIуагъэкIэ Мурманскэ къыщегъэжьагъэу Арктикэм нэ­сыщт газрыкIуапIэм ишIын мылъкоу пэIухьащтымкIэ кIэух унашъо мы охътэ благъэхэм зэдэтшIын тлъэкIыщт», — къы­Iуагъ Андрей Чибис.

«Газпром межрегионгаз» зы­фиIорэм игенеральнэ пащэу Сергей Густовым партийнэ про­ектыкIэкIэ еджагъ газыр аIэкIэгъэхьэгъэным ипрограммэ.

«Губернаторхэм ыкIи партием ипащэхэм сащэгугъы мыщ фэдэ Iофыгъо инэу социальнэ мэхьанэ зиIэмкIэ яшIуагъэ къытагъэкIыным», — къыIуагъ ащ.

Газыр цIыфхэм аIэкIэгъэхьэгъэныр анахь зигъо Iофыгъохэу шъолъырхэм зэшIуахын фаехэм ащыщ, къыхигъэщыгъ полито­логэу, мыкоммерческэ Фондэу «Институт социальнэ-экономических и политических иссле­дований» зыфиIорэм ипащэхэм ясовет итхьаматэу Дмитрий Ба­довскэм.

«Мыр цIыфхэм ящыIакIэ зы­фэдэщтым епхыгъэ шъыпкъэу щыт, егъэлыегъащэу, икъоу зэкIэ къыдамылъытэу, ищыкIагъ-имыщыкIагъэр зэхамыфэу цIыфхэм ахъщэ зэрарагъэтыщтыгъэм гъунэ фэшIыгъэн фае. Шъолъыр­хэмкIэ а Iофыгъор анахь зигъо Iофыгъохэм ащыщэу щыт», — къыIуагъ Дмитрий Бадовскэм.

Партиеу «Единэ Россием» къыгурэIо общественнэ мэхьанэу мы Iофыгъом иIэр зэрэиныр ыкIи щыIэкIэ-псэукIэр нахьышIу шIыгъэнымкIэ газым бэ зэрепхы­гъэр, къыхигъэщыгъ политологэу, граждан обществэм IэпыIэгъу етыгъэнымкIэ Фондым игъэIорышIапIэ итхьаматэ иупчIэжьэгъоу Виталий Ивановым.

«2021-рэ илъэсым тыхэхьагъ нахь мышIэми, газыр зынэ­мысыгъэ чIыпIабэ джыри тиI. Аужыпкъэм а IофыгъомкIэ программэ гъэнэфагъэ зимыIэхэри щыIэх. Арышъ, мы Iофыр Iоф цIыкIоу щытэп, партием джары мэхьанэшхо ащ зыкIыритырэр», — къыкIигъэтхъыгъ экспертым.

«Адыгеим газыр аIэкIэгъэхьэгъэным ылъэныкъокIэ гъэ­хъагъэ­хэр ышIыгъэх, бэшIагъэ респуб­ликэр «Газпромым» шIуа­гъэ къы­тэу зыдэлажьэрэр. Ащ кIэухышIухэр фэхъух, респуб­ликэм ихэхъоныгъэкIэ амалэу щыIэхэр нахьышIу зэрэхъухэрэм дакIоу, инвестициехэр нахьыбэу къытIэкIэхьанхэмкIэ, цIыфхэм ящыIакIэ нахьышIу шIыгъэнымкIэ гугъэпIэ инхэр ащ етэпхых. Газыр анахь чIыпIэ пэIудзыгъэ­хэми анэсы. Урысые Федерацием и Президент ипшъэрылъэу цIыфхэм яунэхэм газыр ящэлIэгъэным фэгъэхьыгъэр зэшIотхыныр ары непэкIэ тэ типшъэ­ры­лъыр. АщкIэ гъусэныгъэ пытэ ады­тиIэщт «Газпромымрэ» «Еди­нэ Россиемрэ». А Iофыгъо­хэр ары партием истратегическэ сессие зыщахэплъагъэхэр», — къыIуагъ Адыгеим и ЛIы­шъхьэу, партиеу «Единэ Рос­сием» ишъолъыр къутамэ и Секретарэу КъумпIыл Мурат.

Шъугу къэтэгъэкIыжьы: газыр ыпкIэ хэмылъэу аIэкIэгъэхьэ­гъэным фэгъэхьыгъэ гъэтэрэзы­жьыныр партием зэхигъэуцуагъ ыкIи Къэралыгъо Думэм къыхилъхьагъ. Законыр мэкъуогъум и 1-м аштагъ. ЫпэкIэ партием Президентым мы Iофым епхыгъэ къэбарыр лъигъэIэсыгъагъ ыкIи къэралыгъом ипащэ ащ къыдыригъэштагъ.