Ковида, аллергия?

Къэгъагъэхэм ыкIи чъыгхэм якъихыгъо-якъэтIэмыгъорэ аллергиер къыз­щежьэрэ лъэхъанымрэ зэтефэх. Зэпахырэ узэу коронавирусым инэ­шанэхэри пIэлъэ гъэнэфагъэкIэ цIыфым къеузырэ аллергием иехэм афэдэхэу къежьэх.

Ахэм узэрябэныщтыр ыкIи зэрэзэтекIыхэрэр зыфэдэхэр клинико-диагностическэ лабораториеу «Инвито-Сибирь» зы­фиIорэм ипащэу, врач-инфекционистэу Андрей Поздняковым къыIотагъ.

КъэкIыхэрэ къэгъагъэхэмрэ уцхэмрэ къапытэкъурэ сапэр (пыльцар) заIуихьэкIэ яорганиз­мэ къемыкIоу ыгъэсымаджэхэу цIыфыбэ щыI. А узым «пол­линоз» раIорэр, аллергиекIи еджэх. Поллинозым инэшанэхэм афэдэхэр Ковид-19-ми, ОРВИ-ми (острая респираторная вирусная инфекция), кIышъо уз зэфэшъхьафхэми яIэнхэ алъэкIыщт.

— Аллергиер анахьэу цIыф­хэм къызапыхьэрэр мэлылъ­фэгъу мазэм къыщегъэжьагъэу Iоныгъом нэс. «Коронавирусыр къызэузыгъэхэм аллергиер къяу­тэкIыгъэу алъытэн алъэ­кIыщт. УзитIуми шъхьэузыр къа­дэкIо, уагъапскэ, пэм жьыр икъоу рыкIорэп, — еIо А. Поздняковым. — Арэущтэу щытми, узхэр зэрэзэфэмыдэхэр къызэрэпшIэщтхэ шIыкIэхэр щыIэх».

Инфекционистым къызэри­Iо­рэмкIэ, коронавирусыр къызэу­тэкIыгъэхэм къаIуатэ бэрэ зэ­рэмыпскэхэрэр, апэ псы къы­зэримычъырэр, ау къарыунчъэ мэхъух, алъакъо къытеуцонхэ алъэкIырэп, ялыпцэхэр мэузых. Аллергием ыгъэгумэкIыхэрэм язытет нахь псынкI. ЦIыфым аллергиер зытIо-зыщэ къеу­тэ­кIыгъэу щытмэ хэт нахьи на­хьышIоу ежьыр ары зы­шIэщтыр.

Коронавирусми аллергиеми цIыфхэм ашхырэм иIэшIугъэ зэхамышIэу, мэу къакIаохэрэр зэхамыфхэу ашIых. Ау Ковидым мэм изэхэшIэн ыгъэкIодыпэуи къыхэкIы.

А. Поздняковым къеIо: «Аллергиер апэрэу къызэутэкIы­хэ­рэм ащ инэшанэхэмрэ нэмыкI узхэм янэшанэхэмрэ зэхагъэ­кIокIэнхэ алъэкIыщт. Джащ фэ­дэу Ковидым игъэхъужьын гурыIогъуаеу зэрэщытым къы­хэ­кIэу ащ инэшанэхэри къэсы­мэджагъэхэм зэхафышъухэрэп. Арышъ, аллергикхэм Ковидыр къяузыгъэми, апэрэ мафэхэм къащегъэжьагъэу аллергиер къапыхьагъэу къашIошIы».

Врачым къыхегъэщы аллергиер инфекционнэ узхэм ащыщ рагъапшэу зэрэхъурэр. ГущыIэм пае, сымаджэм ышъхьэ мэу­зы, ыпэ жьы рыкIорэп, хэпскэуIукIы, мэхэр зэхифышъухэрэп, джахэм афэдэхэ нэшанэхэр нэ­гъу узхэми къатын алъэ­кIыщт.

ШIэгъэн фаехэр

А. Поздняковым зэрилъытэ­рэмкIэ, илъэс къэс а зы охътэ пIалъэм тефэу цIыфым пскэныр къыригъажьэу, ыпэ жьы рымыкIоу, ау ахэр мэфэ заулэкIэ зэпыужьхэмэ, ащ фэдэ сыма­джэм гъэнэфагъэу къеузыгъэр аллергиер ары. Сымаджэр ипсау­­ныгъэ изытет ежь-ежьырэу лъыплъэзэ, къыкIэлъыкIорэ илъэ­­ситIу-щым ащ фэдэ уз ащ фэдэ уахътэм къештэмэ зиуплъэкIукIэ, зыгъэгумэкIырэ узыр нэмыкI­хэм ахимыгъэкIокIэжьэу хъущт.

ЗэкIэм анахьышIур врачым зыIубгъэкIэныр ары. Узыгъэгу­мэкIырэ шъыпкъэр къагъотыным фэшI ушэтынхэр (анализхэр) ябгъэшIынхэу щыт. Сымаджэм ылъ эозинофилхэр, иммуноглобулинхэр хэлъхэ зыхъукIэ, аллергиер къызэреузырэр ахэм къагъэлъагъо.

Ковидыр зэрауплъэкIурэ шIы­кIэхэри щыIэх. Ахэм ащыщ лъыр ауплъэкIоу лейкоцитхэм япчъа­гъэ нахь макIэ хъугъэмэ къызэрэхагъэщырэр, нэмыкIхэри.

Аллергием зызэрэщыуухъумэщтыр

Аллергием зыщыуухъумэмэ, къыппымыхьан ылъэкIыщт. Ащ пае спрейхэр, нэмыкI щыфэ зэфэшъхьафхэр агъэфедэх, нэ­гъунджэхэр зыIуалъхьэх, анэхэм ящыкIэгъэхэ уцхэр акIагъаткIох. Джащ фэд, сымаджэм маскэ зыIуилъхьэмэ, ишIуагъэ къэ­кIощт. Унэм укъызыкIожьыкIэ щыгъынхэу пщыгъыгъэхэр зыщыпхыхэмэ дэгъу. «Мафэ къэс зыптхьакIын, зыбгъэпскIын, пшъхьац пфыкIэн фае. Унэ кIо­цIым джэхашъор щып­тхьа­кIымэ, хъэдэн цIынэкIэ са­пэр ­плъэкIымэ ишIуагъэ къэ­кIощт», — еIо врачэу А. Поздняковым.

Ковидыр къызэрэппымыхьа­нэу ар къызэузыгъэ цIыфхэм уакIэрымыхьаныр, вакцинацие пшIыныр тищыкIагъэхэу елъытэх.

Шъаукъо Аслъангуащ.