ЧIыопсыр къаухъумэ

Тызыщыпсэурэ дунаим ичIыопс икъэухъумэн кIэлэ­еджакIохэр зэрэхэлажьэхэрэм фэгъэхьыгъэ сурэтхэмкIэ зэ­фэ­хьысыжь зэхахьэ Мыекъуапэ щыкIуагъ. Адыгэ Республикэм культурэмкIэ и Министерствэ, АР-м искусствэхэмкIэ икIэлэцIыкIу еджапIэу N 1-м методикэмкIэ и Гупчэрэ пленер шIыкIэм тетэу зэнэкъокъур зэхащагъ. СурэтышIхэм хъугъэ-шIагъэхэр, щыIэныгъэм къыхэхыгъэ пычыгъохэр, зэIу­кIэгъухэм еплъыкIэу афыряIэм яхьылIэгъэ сурэтхэр ашIыгъэх.

Республикэм исурэтышIхэм я Союз итхьа­матэу Елена Абакумовам зэхахьэм къыщиIуагъ лъэпкъ шэн-хабзэхэм, чIыопсым идэхагъэ, псауныгъэм икъэухъумэн, спортым, нэмыкIхэм яхьылIэгъэ сурэтхэр гъэшIэгъонэу зэрэгъэпсыгъэхэр.

ЕджэкIо 38-рэ зэнэкъокъум хэлэжьагъ. Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм, Джаджэ, Инэм, Мыекъуапэ, Гъобэкъуае, Адыгэкъалэ, Тэхъутэмыкъуае, Кощхьэблэ ыкIи Мыекъопэ районхэм, фэшъхьафхэм яеджакIохэм яIэпэIэсэныгъэ зэрэхагъахъорэр сурэтхэм ахэолъагъо.

Джаджэ зыщызыгъэсэрэ Софья Рычковам, ащ икIэлэегъаджэу Лусине Марукян къытфаIотагъ зэнэкъокъум ягуапэу зэрэхэлэжьагъэхэр. С. Рычковам Щытхъу тхылъыр къыфагъэшъошагъ.

Чэтыухъу Бэлэ Мыекъуапэ илицееу N 35-м щеджэ, искусствэхэмкIэ кIэлэцIыкIу еджапIэу К. Лъэцэрыкъом ыцIэ зыхьырэм иIэпэIэсэныгъэ щыхегъахъо.
— Сянэу Сусанэ сигъусэу зэхахьэм сыкъэкIуагъ, — къытиIуагъ Чэтыухъу Бэлэ. — ЧIыопсым икъэухъумэн гупшысэу фытиIэр сурэтхэм къащытэгъэлъагъо. Сяни, сикIэлэегъаджэхэри сурэтхэм якъыхэхынкIэ IэпыIэгъу къысфэхъух, лъэшэу сафэраз.

Елена Абакумовар сурэтхэр анахь дэгъоу зышIыгъэхэм, кIэлэегъаджэхэм афэгушIуагъ, щытхъу тхылъхэр аритыжьыгъ.

Сурэтым итхэр: зэхахьэм хэлэжьагъэхэр.