Iофтхьабзэм дырагъэштагъ

Урысые Iофтхьабзэу «Щынэгъончъагъэм ия 6-рэ Гло­баль­нэ тхьамаф» зыфиIорэр макIо. Ащ къыдыхэлъытагъэу Адыгеим икъэралыгъо автоинспекторхэм Iоф­тхьэбзэ зэфэшъхьафхэр республикэм щызэхащэх. Автомобилистхэм я Урысые обществэу Адыгеим щыIэм илIыкIохэм Iоф­тхьабзэм дырагъэштагъ.

Пшъэрылъ шъхьаIэр — къоджэ псэупIэхэм ащызе­кIохэ зыхъукIэ, водительхэм псынкIэ зекIоныр щагъэзыеныр, гъэсэныгъэм иучреж­дениехэм яIэгъо-блэгъу са­къыныгъэ нахь къыз­щыха­гъэфэныр. ЦIыф псэупIэхэм апэмычы­жьэу щызекIохэрэр скоростымкIэ шапхъэхэм арыгъозэнхэм къыфэ­джагъ автомобилистхэм яобществэ ипащэу Хъот Мурат. ПсынкIэ зекIоным шIуагъэ къызэримы­хьырэм, гъогурыкIоным ишапхъэхэр амыукъонхэм ащ анаIэ тырари­гъэдзагъ.