Лъэпкъ проектыкIэ аштагъ

ЗекIоным фэгъэхьыгъэу лъэпкъ проектыкIэ къэралыгъом ыштагъ, ащ зэреджагъэхэр «ЗекIонымрэ хьакIэхэм узэрапэгъокIыщтымрэ». Проектым игъэцэкIэн Урысыем ишъолъыр пстэури хэлэжьэщт.

Урысые Федерацием и Премьер-министрэу М. Мишустиным проектым ишIуагъэкIэ цIыфхэм языгъэпсэфыгъо уахътэ на­хьы­шIоу зэхэщагъэ хъунэу, туркомпаниехэм яIоф­шIакIэ зыкъыригъэIэтынэу зэрэгугъэрэр къыIуагъ.

2030-рэ илъэсым нэс проектым къыдилъытэрэ Iофыгъохэр рагъэцэкIэнхэу федеральнэ бюджетым сомэ миллиард 529-рэ къыхагъэкIыщт, ащ фэшъхьафэу шъолъырхэм сомэ миллиард 72-рэ къызэхалъхьащт.

ИкIыгъэ илъэсым IэкIыб къэралыгъохэм закъыщызыгъэпсэфынэу кIощтыгъэ цIыфхэм япчъагъэ лъэшэу къыщыкIагъ. Короновирусым зыщаухъумэным пае хэгъэгу кIоцIым зыщы­зыплъыхьагъэри макIэп, ахэм чIыпIэ гъэшIэгъонхэр, зыгъэпсэфыпIэ гу­псэфхэр зэрэтиIэхэр къа­лъэгъугъ.
— Анахь Iоф шъхьаIэу мы лъэхъаным алъытэрэр зыгъэпсэфакIо кIорэ цIыф­хэм ящыкIэгъэ фэIо-фа­шIэхэр икъоу арагъэгъотын­хэр ыкIи дахэу къапэгъо­кIынхэр ары. Ахэм ягъэцэкIэн фэгъэхьыгъ унэ­шъуакIэу проектыкIэм къыщы­хагъэщыгъэр.

Сабый цIыкIухэр ягъу­сэхэу зыгъэпсэфакIо кIорэ унагъохэм фэгъэкIотэнэу афашIыщтхэми уащыгугъы­нэу щыт. Къихьэгъэ илъэ­сым тегъэпсыхьагъэу сабый мин 360-рэ фэдизмэ путевкэхэр зэрагъэгъотыгъахэх, ахэм алъатыгъэ ахъщэм ызыныкъо хабзэм къафызэкIигъэкIожьыщт. Ащ ишIуагъэкIэ илъэсым къыкIоцI ахэм чIыпIитIумэ защагъэпсэфын алъэкIыщт.

Лъэпкъ проектыкIэу Рос­туризмэм къыгъэхьазырыгъэм чIыпIэ пстэуми зыгъэпсэфыпIэхэр аща­гъэпсынхэу къыделъытэ, къэкIорэ мазэм къыщыублагъэу Iофыгъохэм ягъэ­цэкIэн рагъэжьэщт.