Мыгъэ еджапIэхэм къачIэкIыхэрэм ушэтынхэр зэракIущтхэм УФ-м просвещениемкIэ и Министерстви, Рособрнадзорми ялIыкIохэр бэрэ егупшысагъэх ыкIи зы кIэух къыфэкIуагъэх — зэикI ушэтынхэр зыкIущтхэр апшъэрэ еджапIэхэм ачIэхьанхэу зызыгъэхьазырхэрэр арых ныIэп. Адрэхэм къызэрэчIэкIырэ экзаменхэр ежь еджапIэм щатыщтых.
Мыгъэ гурыт еджапIэм укъычIэкIэу апшъэрэ еджапIэм учIэхьаным пае урысыбзэмкIэ ушэтыныр пкIунышъ, анахь балл макIэм къыщымыкIэу къэпхьын фае. ХьисапымкIэ базовэ ушэтынэу блэкIыгъэ илъэсхэм акIущтыгъэр мыгъэ зэхащэщтэп.
Ащ фэдэу зэпахырэ узым цIыфхэр нахь щыухъумэгъэнхэм пае еджапIэм къычIэкIыхэрэм пэшIорыгъэшъэу экзаменхэр зэратыщтыгъэхэм фэдэу мы илъэсым атыщтхэп.
2021-рэ илъэсым гурыт еджапIэр къэзыухэу, ау апшъэрэ еджапIэм чIэмыхьащтым аттестат къыратыным пае ЕГЭ-м ычIыпIэкIэ урысыбзэмрэ хьисапымрэкIэ еджапIэм экзаменхэр щикIущтых. Ушэтын IофшIэн фэдэхэу а предметхэр еджапIэхэм жъоныгъуакIэм и 25-м ащырагъэжьэщтых. Мы мафэм урысыбзэмкIэ, жъоныгъуакIэм и 28-м хьисапымкIэ ушэтын IофшIэнхэр атыщтых. Зымытышъухэрэм мэкъуогъум и 8-м урысыбзэмкIэ ыкIи мэкъуогъум и 10-м хьисапымкIэ атыжьынхэ алъэкIыщт.
ЕджапIэхэм къачIэкIынхэу апшъэрэ еджапIэхэм ачIэхьащтхэм апае зэтыгъоу атырэ экзаменхэу афызэхащэщтхэм ятыгъо шъхьаIэ жъоныгъуакIэм и 31-м рагъэжьэщт. А мафэм географиер, литературэр ыкIи химиер, мэкъуогъум и 3-м ыкIи и 4-м урысыбзэр атыщт. Профильнэ хьисапымкIэ ушэтыныр мэкъуогъум и 7-м, тарихъымрэ физикэмрэкIэ мэкъуогъум и 11-м, обществознаниемкIэ мэкъуогъум и 15-м ушэтынхэр кIощтых. IэкIыб къэралыгъуабзэхэмкIэ (тхэн IофшIэныр) ыкIи биологиер мэкъуогъум и 18-м атыщтых. ЖъоныгъуакIэм и 21-м ыкIи и 22-м IэкIыб къэралыгъуабзэхэмкIэ (жэрыIоу) экзаменхэр зэхащэщтых, информатикэмрэ компьютернэ технологиемрэкIэ мэкъуогъум и 24-м ыкIи и 25-м ушэтынхэр кIощтых.
Тыгъо шъхьаIэм ушэтынхэр зымыкIушъухэрэм зыщатыжьынхэ алъэкIыщт мафэхэри къафагъэнэфагъэх.
Сихъу Гощнагъу.