Мэхьанэшхо реты

Уз хьылъэу коронавирусым тыпэшIуекIонымкIэ анахь мэхьэнэ ин зиIэр вакцинэр зыхэплъхьаныр ары. Адыгеим ар къызIэкIэхьагъэр тIэкIу шIагъэ ыкIи цIыфхэм жъугъэу зыхарагъэлъхьанэу рагъэжьагъ. Шъыпкъэ, ащ шIуагъэ къымытынэу зыIохэрэри щыIэх, ау нахьыбэм япсауныгъэкIэ Iэзэгъу афэхъущт прививкэр ягуапэу ашIы. Адыгеим икъэлэ шъхьаIэ имызакъоу, районхэм, къуаджэхэм пунктхэр къащызэIуахыгъэх, нахьыбэу цIыфхэм зэрахалъхьащтым пылъых.

Шэуджэн районым ипащэу Аулъэ Рэщыдэ прививкэ языгъэшIыгъэхэм ащыщ. Ащ къызэриIорэмкIэ, непэ узыр къыомыутэкIынымкIэ анахь зишIуагъэ къэкIощтхэм ар ащыщ.

— Мэлылъфэгъум и I3-м апэрэ вакцинэр зыхэслъхьагъ. Сипкъышъол ар къехьылъэкIыгъэу, е сигъэсымэджагъэу зэхэсшIагъэп, — къеIуатэ Аулъэ Рэщыдэ. – ЯтIонэрэ прививкэр жъоныгъуакIэм и 4-м зыхэслъхьагъ.

ТигущыIэгъу тызэрэщигъэгъозагъэмкIэ, мы лъэныкъом мэхьанэшхо реты. Зэхэсыгъоу зэхищэрэ пэпчъ цIыфхэм прививкэ ашIынэу къяджэ. Ащ ишIуагъэ къызэрэкIорэр зэрагуригъэIощтым ишъыпкъэу пылъ. Вакцинэм ущыщынэнэу зэрэщымытыр ежь ищысэкIэ цIыфхэм арегъэлъэгъу.

Шъугу къэтэгъэкIыжьы, ковидым пэшIуекIорэ вакцинэм иапэрэ ыкIи иятIонэрэ хэлъхьэгъухэм азыфагу мэфэ тIокIым ехъу илъын фае. Мыщ дэжьым къэIогъэн фае, пэтхъу-Iутхъур къызыоузыгъэ нэуж тхьамэфитIу зытешIэкIэ ары ныIэп вакцинэр зызхябгъэлъхьан плъэкIыщтыр. Прививкэ ужым пкъынэ-лынэр къарыунчъэ мэхъу. Ащ пэтхъу-Iутхъу вирусыр къызыхэ­хьажьыкIэ, пкъынэ-лынэр ебэнын фае. Ащ фэдэ мыхъуным пае узфэсакъыжьын фае. Зышъумгъэсымадж, шапхъэхэм атетэу шъупсэу!