Зыхябгъалъхьэмэ нахьышIу

Зэрэдунаеу зэлъызыштэгъэ узэу коронавирусыр зэкIэкIуагъэ нахь мышIэми, ар къытпыхьаным ищынагъо джыри къытшъхьащыт. Непэ ащ пэуцужьырэ закъор вакцинэр ары. Зыныбжь хэкIотагъэхэр анахьэу щынагъо зышъхьащыт купхэм ахалъытэх, арышъ, япсауныгъэкIэ вакцинацием мэхьанэшхо иI.

Коронавирусым пэуцужьырэ вакцинэр зыхязгъэлъхьагъэхэм ащыщ  Урысые Федерацием физическэ культурэмкIэ изаслуженнэ IофышIэу Джарымэкъо Юсыф. Узым икъиныгъохэр зэхэзышIагъэхэм мыр ащыщ.

— Зэпахырэ узыр къежьэгъакIэу апэ сымаджэ хъугъэхэм сащыщ, — къеIуатэ Джарымэкъо Юсыф. – Ковидым пэуцужьырэ вакцинэр къежьагъэу зызэхэсэхым ар зыхязгъэлъхьанэу исхъухьагъ, а зыр ары хэкIыпIэу джыдэдэм щыIэр. Ащ нахьыбэрэ сысымэджэнэу  сыфаеп. Прививкэм иапэрэ хэлъхьэгъу къысфашIыгъэр. Сыд фэдэрэ лъэныкъокIи зэхэсшIагъэп, къысэхьылъэкIыгъэп. Джы жъоныгъуакIэм ыкIэхэм ятIонэрэ едзыгъор язгъэшIыщт.

ШIоигъоныгъэ зиIэ пстэури темыщыныхьэхэу прививкэр  зыщахалъхьэрэ чIыпэхэхэм якIолIэнхэ алъэкIыщт.