Коронавирусым пэуцужьырэ вакцинэр зыхалъхьагъэхэм ащыщ республикэ гъэзетэу «Адыгэ макъэм» иредактор шъхьаIэу Дэрбэ Тимур.

— ИкIыгъэ илъэсым ишэкIогъу мазэ зэпахырэ узэу ковидыр къысэутэкIыгъагъ, — къеIуатэ ащ. – Мазэ тешIи лъыр зысэтым, антителлахэр симыIэхэу къычIэкIыгъ. Хэти сыригъэзыгъэп, сипсауныгъэ къэсыухъумэ сшIоигъоу коронавирусым пэуцужьырэ прививкэр зыхязгъэлъхьанэу исхъухьагъ. Апэрэ едзыгъор язгъэшIыгъ. Сипсауныгъэ изытет зэхъокIыгъэп, сыд фэдэкIи сигъэгумэкIыгъэп. ЯтIонэрэ хэлъхьагъум ипIалъэ джы сежэ. Ащ ыуж антителлахэр сиIэхэмэ язгъэуплъэкIужьыщт.

Дэрбэ Тимур зэрилъытэрэмкIэ, мыщ егъэзыгъэ Iоф хэлъэу щытэп. Ау узым ищынагъо джыри къызэрэтшъхьащытыр, вакцинацием ащ тызэрэщиухъумэщтыр,  цIыфхэр япсауныгъэ фэсакъынхэу зэрэщытыр агу къегъэкIыжьы.