IэзапIэм ипащэ вакцинэр зыхаригъэлъхьагъ

Мыекъопэ къэлэ IэзапIэу N1-м иврач шъхьаIэу ЕмтIылъ Оксанэ коронавирусым пэуцужьырэ вакцинэр зыхаригъэлъхьагъ. Ащ ыуж ипсауныгъэ изытет зыфэдагъэр ыкIи прививкэр зыкIашIын фаер ащ къедгъэIотагъ.

— IофшIэнэу згъэцакIэрэм елъытыгъэу, коронавирус уз мэхъаджэм ыпкъ къикIыкIэ икIы­гъэ илъэс псаум къиныгъоу зэ­пытчыгъэхэм саришыхьатыгъ, — къеIуатэ ЕмтIылъ Оксанэ. — Къыспэблэгъэ цIыфхэм, си­IофшIэгъухэм ащыщхэми ящы­Iэныгъэ ащ зыдихьыгъ. Сэ сшъхьэкIэ тIо сысымэджагъ, ящэнэрэу спэкIэкIынэу сыфэе­жьэп. Ащ ихэкIыпIэу слъэгъурэр вакцинэр зыхязгъэлъхьаныр арыти, едзыгъуитIури сшIыгъэх. Сипсауныгъэ лъэшэу къехьы­лъэкIыгъэу щытэп, температурэ ин сиIагъэп, ау пчыхьэм сы­гъойщае фэдэу, сIэпкъ-лъэпкъхэр зэшIуищыхэу, чъыем сихьэу щытыгъ. Пчэдыжьым зып­къ си­­уцожьыгъ.

Къэлэ IэзапIэм иврач шъхьаIэ цIыфхэм закъыфегъазэ вакци­нэр зыхарагъэлъхьанэу. COVID-19-м пэуцужьын ылъэкIыщтыр вакцинациер ары. Ар респуб­ликэм щыпсэухэрэм къагурыIон ыкIи врачхэм къаIорэм диштэу зекIонхэр нахь тэрэзэу елъытэ. Ящэнэрэ едзыгъоу нэмыкI къэ­ралыгъохэр мы уахътэ зезы­дзэхэрэм зыщытыухъумэнымкIэ мыщ мэхьанэшхо иI. ЦIыфхэм япсауныгъэ фэсакъынхэу Ем­тIылъ Оксанэ къяджэ.

ШъушIэным пай, АР-м псауныгъэр къэухъумэгъэнымкIэ и Министерствэ къызэритыгъэмкIэ, COVID-19-м пэуцужьырэ прививкэр зыщахалъхьэрэ чIыпIэ 32-рэ республикэм ит, нэбгырэ мин 20-м ехъумэ ар афашIыгъ.

Вакцинациер республикэм зэрэщыкIорэр цIыфхэм алъы­гъэIэсыгъэным, медицинэ Iофы­шIэхэм унагъохэр къакIухьанхэм епхыгъэ IофшIэныр гъэлъэ­шыгъэн фаеу Адыгеим и ЛIы­шъхьэу КъумпIыл Мурат афи­гъэпытагъ. Анахьэу анаIэ зыты­рагъэтын фаер зыныбжь илъэс 65-м къехъугъэхэр ыкIи узыр къапы­хьанымкIэ щынагъо зы­шъхьарытхэр ары.

Iэшъынэ Сусан.