Щынэгъончъагъэм фэгъэхьыгъагъ

«Россети Кубань» и Адыгэ шъо­лъыр къутамэрэ Мыекъопэ къэлэ администрацием гъэсэныгъэмкIэ и Комитетрэ яIофышIэхэм электроэнергиер щынэгъончъэу гъэфедэгъэным фэгъэхьыгъэ урок гурыт еджапIэу N 8-м щызэхащэгъагъ.


Энергетикхэм электричествэм имэхьанэ, щыIэныгъэм чIыпIэу щиубытырэр, ащ дакIоуи, уфэмысакъымэ, щынагъо зэрэхэлъыр кIэлэеджакIохэм къафаIотагъ. Электропсэуалъэу унагъохэм агъэфедэхэрэм узэрадэзекIощтым, урамым утетымэ электричествэм икIуапIэхэм, подстанциехэм узэрафэсакъыщтым специалистхэр къатегущыIагъэх, тамыгъэу ахэм атырагъэуцохэрэр къарагъэлъэгъугъэх, ямэхьанэ къаIотагъ. Джащ фэдэу мы темэм фэгъэхьыгъэу мультфильмэ къафагъэлъэгъуагъ. Ежь кIэлэеджакIохэми электроэнергием, щынэгъончъагъэм афэгъэхьыгъэу ашIэ­хэрэмкIэ ягуапэу къадэгощагъэх.

— Электричествэм шъобж цIыфхэм атыримыщэным, ащ епхыгъэ псэуалъэ­хэм яягъэ къэмыкIоным фытегъэпсыхьагъэу программэ компанием пхырещы. Ащ къыдыхэлъытагъ кIэлэцIыкIухэмрэ зихэхъогъухэмрэ щынэгъончъэу электричествэр зэрагъэфедэщтым фэзыгъа­сэхэрэм Iофтхьабзэхэр гъэсэныгъэм иучреждениехэм ащызэхэщэгъэнхэр. Мары мэфэ фабэхэр къэблагъэх, ахэр нахьыбэу урамыр ары зыщагъакIохэрэр. Арышъ, электричествэм епхыгъэ псэуа­лъэхэм апэблагъэхэ зыхъукIэ шапхъэу агъэцэкIэн фаехэр алъыдгъэIэсынхэр шIокI зимыIэ Iофэу щыт, — къыIуагъ «Россети Кубань» и Адыгэ шъолъыр къутамэ ипащэу Рустам Магдеевым.