Хэбзэгъэуцугъэм диштэу

Илъэсыр къызихьагъэм къыщыублагъэу зыщымыгъэнэфэгъэ чIыпIэм хэкIитэкъупIэ щашIыгъэу «ЭкоЦентрэм» гъогогъуиблырэ Iуищыжьыгъ. Къалэу Мыекъуапэ, Джэджэ, Кощхьэблэ ыкIи Тэхъутэмыкъое районхэр ары ащ фэдэ «полигонхэр» зыщашIыгъагъэхэр. Графикыр амыукъоу игъом автомашинэхэм пыдзафэхэр Iуащынхэу, юридическэ лицэхэми хэкIыр афыдащынэу амал яI нахь мышIэми, шъхьадж зыщыфаем щыретэкъу.

2021-рэ илъэсым пыкIыгъэ уахътэр пштэмэ, предпринимателэу е юридическэ лицоу 100 фэдизмэ шъолъыр операторым зэзэгъыныгъэ дамышIыгъэу экологием изытет лъыплъэхэрэм къыхагъэщыгъ. Ащ фэдэу законыр зыукъохэрэм тазырэу сомэ мин 250-рэ фэдиз атынэу ащ къыщыдэлъытагъ.

Шъугу къэдгъэкIыжьын, шъо­лъыр операторым хэкIыр Iуищыным пае лъэIу тхылъыр офисым уемыкIуалIэми птын плъэкIыщт. Ащ пае интернет нэкIубгъоу «https://adygea.clean-rf.ru» зыфиIорэм уихьанышъ, шIыкIэу зэрэгъэпсыгъэщтыр къыдэпхыщт. Нэужым ащ ищыкIагъэр итха­гъэу, тхылъхэр игъусэхэу электроннэ почтэмкIэ бгъэхьыжьыщт. Мары иадрес: adg_ecocentr@clean-rf.ru. Мы телефонымкIэ утеоми, упчIэхэм яджэуапхэр бгъотыщтых: 8-800-707-5-08.

Электроннэ шIыкIэм тетэу

Пыдзэфэ пытэхэр зэрэIуащыхэрэм ыуасэ зэрыт квитанциер электроннэ шIыкIэм тетэу къызIэкIэбгъэхьан плъэкIынэу хъугъэ. Ар нахь Iэрыфэгъоу къыхэзыхыхэрэм ООО-у «ЭкоЦентрэм» иинтернет нэкIубгъо щагъэпсын алъэкIыщт.

— Электроннэ шIыкIэм тетэу гъэпсыгъэ квитанцием шIогъабэ хэлъ. Ар узщыфаем къызIэкIэбгъэхьан плъэкIыщт, электроннэ почтэм е хъарзынэщхэм ащыпIыгъынкIэ Iэрыфэгъу. Ахэм ямызакъоу, хэкIыр зэрэIуащырэм ыуасэ иIахьыл-гупсэхэм афитымэ зышIоигъохэм ахэр амыгъэгумэкIыхэу, квитанцием итым зыщагъэгъозэн амал яI, — къыIуагъ «ЭкоЦентрэм» и Адыгэ шъолъыр къутамэ ипащэу Алыбэрд Налбый.

Электроннэ шIыкIэм тетэу гъэпсыгъэ квитанцием узэрэтехьащтымкIэ упчIэ зиIэхэр пчэдыжьым сыхьатыр 10-м къыщыублагъэу пчыхьэм 7-м нэс мы телефонымкIэ къытеонхэ алъэкIыщт: 8-995-904-98-94.

ООО-у «ЭкоЦентрэм» и Адыгэ шъолъыр къутамэ ипресс-къулыкъу.