Хъопсэрыкъо Мурат Красногвардейскэ районым щыIагъ

Адыгеим ыцIэкIэ сенаторэу, партиеу «Единэ Россием» хэтэу Хъопсэрыкъо Мурат Красногвардейскэ районым тыгъуасэ зэкIом, гъэсэныгъэмрэ культурэмрэ япсэуалъэхэу лъэпкъ проектхэмрэ федеральнэ программэхэмрэ къадыхэлъытагъэу агъэпсыхэрэм е агъэцэкIэжьхэрэм ащыIагъ.

Сенаторым игъусагъэх муниципалитетым ипащэу Гъуб­жьэ­къо Темур, Красногвардейскэ районым инароднэ депутатхэм я Совет итхьаматэу Анна Выставкинар, муниципальнэ образованием иадминистрацие иподразделениехэм япащэхэр.

УФ-м и Федеральнэ ЗэIукIэ ФедерациемкIэ и Совет хэтэу Хъопсэрыкъо Мурат культурэм иунакIэу къэралыгъо программэу «Къуаджэхэм зэдиштэу хэхъоныгъэ ягъэшIыгъэныр» зыфиIо­рэм диштэу селоу Белэм щагъэ­псыгъэр къыплъыхьагъ.

Нэбгырэ 200-мэ ателъытэгъэ зал зыхэт клубыкIэм ишIын пае сомэ миллион 46,7-рэ къыхагъэ­кIыгъ. 2020-рэ илъэсым ащ Iоф­шIэн зэфэшъхьафхэр рашIылIагъэх. Культурэм и Унэ ищыкIэгъэ мебелымрэ оборудованиемрэ чIагъэуцуагъэх, ащ къыпэIулъ чIыпIэм изэтегъэпсыхьан шIэхэу фежьэщтых. Нэбгырэ 386-рэ зыхэхьэрэ клуб 23-рэ ащ щызэхэщагъ.

Сенаторыр культурэм и Унэ ипащэ дэгущыIагъ, творческэ купхэм ахэтхэм нэIуасэ зафишIыгъ, гъэхъагъэхэр ашIынэу афэлъэIуагъ.

Нэужым парламентарием сабыи 120-мэ атегъэпсыхьэгъэ кIэлэцIыкIу IыгъыпIэу селоу Белэм щашIырэр къызэпиплъы­хьагъ. Лъэпкъ проектэу «Демография» зыфиIорэм тетэу ар агъэпсы, сомэ миллион 90-рэ фэдиз ащ пэIухьанэу къырадзэ.

Муниципалитетым ипащэу Гъубжьэкъо Темур къызэриIуагъэмкIэ, ащ фэдэ кIэлэцIыкIу IыгъыпIэхэр селоу Садовэми, къуаджэу Хьатикъуаий ащагъэ­псых. Сабый 360-м къехъу ахэм къякIолIэщт, загъэпсыхэкIэ чэзыу щыIэжьыщтэп.

ЕтIанэ сенаторыр культурэмкIэ район Унэу Красногвардейскэ дэтым щыIагъ. Лъэпкъ проектэу «Культура» зыфиIорэм къыдыхэлъытагъэу ащ гъэцэ­кIэжьын IофшIэнхэр игъэкIотыгъэу 2019-рэ илъэсым щыкIуагъэх. Ащ пае пстэумкIи сомэ миллион 26-рэ къыхагъэкIыгъ. Ащ нэмыкIэу культурэм и Унэ икинозал зэтегъэпсыхьэгъэным паи сомэ миллиони 5 хъурэ грант къаратыгъ.

Сенаторым клубым зыщип­лъыхьагъ, къэшъуапIэхэм, актовэ залым ачIэхьагъ, творческэ объединениехэм Iоф зэрашIэрэм кIэупчIагъ. Нэбгырэ мини 2,4-м ехъу зыхэлэжьэрэ клуб 55-рэ мыщ щызэхэщагъ. ФедерациемкIэ Советым хэтым гъэцэкIэжьын IофшIэнхэм осэшIу къафишIыгъ, культурэм и Унэ иIофшIэн дэгъоу зэхищэу ылъытагъ.

«ШъыпкъэмкIэ, лъэпкъ хабзэхэр къызэтегъэнэжьыгъэнхэмкIэ, цIыфхэм ятворческэ амалхэм зыкъызэIуягъэхыгъэнымкIэ, ныбжь зэфэмыдэ зиIэхэр зэлъы­IэсынхэмкIэ культурэм иунэхэу джырэ шапхъэхэм адиштэу зэтегъэпсыхьагъэхэр ящыкIагъэх. Къоджэдэсхэм ящыIэкIэ-псэукIэ нахьышIу шIыгъэныр Урысыем и Президентэу Владимир Путиным пшъэрылъ шъхьаIэу къыгъэ­нэфагъэхэм ащыщ. Мы лъэныкъомкIэ мэхьанэшхо иI культурэм иучреждениехэм хэхъоныгъэ ягъэшIыгъэным. Непэ тэ тэлъэгъу культурэм икъоджэ унэхэм ащызэхащэрэ Iофтхьабзэхэр цIыфхэм зэрящыкIагъэр. Ахэр нахьышIоу зэтегъэпсыхьэгъэнхэм тапэкIи тыпылъыщт», — къыIуагъ Хъопсэрыкъо Мурат.

Джащ фэдэу парламентариер селоу Красногвардейскэм ипаркэу зэтырагъэпсыхьажьыгъэми щыIагъ. Къэралыгъо программэу «Джырэ шапхъэхэм адиштэрэ къэлэ щыIакI» зыфиIорэм къыдыхэлъытагъэу ар агъэкIэжьыгъ.

Нэужым Хъопсэрыкъо Мурат партиеу «Единэ Россием» ичIыпIэ отделение иобщественнэ приемнэ щыIагъ. Ащ ипащэу Виталий Тарасовым къызэриIуа­гъэмкIэ, пандемием ыпкъ къи­кIыкIэ цIыфхэм пэIудзыгъэ шIы­кIэм тетэу адэлажьэх. ЦIыфхэм ашъхьэ Iофхэм е общественнэ мэхьанэ зиIэ Iофыгъохэм афэгъэхьыгъэу тхылъ 40-м ехъу 2021-рэ илъэсым къаIэкIэхьагъ. Анахьэу цIыфхэр зыгъэгумэкI­хэрэр ЖКХ-м, поселкэм иинфраструктурэ игъэпсын, псауныгъэм икъэухъумэн, Iэзэгъу уцхэр аIэкIэгъэхьэгъэнхэм, социальнэ фэIо-фашIэхэр афэгъэцэкIэгъэнхэм япхыгъэ Iофыгъохэр ары. Районым ипащэрэ народнэ депутатхэм я Совет итхьаматэрэ хэлажьэхэзэ, Iофыгъо пстэуми ахэплъагъэх, къоджэдэсхэм IэпыIэгъу афэхъугъэнымкIэ ищыкIэгъэ амалхэр зэрахьагъэх.

Сенаторэу Хъопсэрыкъо Мурат цIыфхэм закъызэрафагъа­зэрэ тхылъхэр икъоу зэхафынхэм мэхьанэшхо зэриIэр хигъэу­нэфыкIыгъ, Адыгеим и ЛIышъхьэу, партиеу «Единэ Россием» ишъолъыр къутамэ и Секретарэу КъумпIыл Мурат а лъэныкъом лъэшэу ынаIэ зэрэтыригъэтырэр къыIуагъ.

ФедерациемкIэ Советым хэтыр искусствэхэмкIэ кIэлэцIыкIу еджапIэу селоу Красногвардейскэм дэтми щыIагъ. УФ-м и Президент 2020-рэ илъэсым щылэ мазэм и 15-м Федеральнэ ЗэIукIэм фигъэхьыгъэ тхы­лъым къыщыдэлъытагъэхэр гъэ­цэкIэгъэнхэм тегъэпсыхьа­гъэу, къэралыгъо программэу «Культурэм зегъэушъомбгъу­гъэныр» зыфиIорэм къыдыхэ­лъытагъэу сомэ миллион 15,7-рэ зытефэгъэ гъэцэкIэжьын Iоф­шIэнхэр ащ рашIылIагъэх. Агъэ­кIэжьыгъэ еджапIэм непэ кIэлэцIыкIу 200-м ехъу къекIуалIэ.

Хъопсэрыкъо Мурат искусствэхэмкIэ кIэлэцIыкIу еджапIэр уахътэм диштэу зэтырагъэпсы­хьажьыгъэу ылъытагъ, музыкант, къэшъокIо цIыкIухэм творческэ зэнэкъокъухэм текIоныгъакIэхэр ащашIынэу афэлъэIуагъ.

Адыгэ Республикэм и ЛIышъхьэ ипресс-къулыкъу