Нэбгырэ 90-м ехъумэ яцэкъагъэх

Мы илъэсым иаужырэ мэзитIу Адыгеим щы­псэурэ нэбгырэ 90-м ехъумэ псэушъхьэхэр къяцэкъагъэхэу агъэунэфыгъ.

БлэкIыгъэ илъэсхэм ягъэпшагъэмэ, мыщ фэдэ ушъхьагъу яIэу медицинэ IэпыIэгъу зэз­гъэ­гъотынэу врачхэм яуалIэ­хэрэм япчъагъэ нахь макIэ хъугъэ. Ау гумэкIыгъор дэгъэзыжьыгъэ хъугъэп.

Роспотребнадзорым и ГъэIорышIапIэу АР-м щыIэм къызэритырэмкIэ, 2020-рэ илъэсым псэушъхьэ къяцэкъагъэу нэбгырэ 635-мэ медицинэ IэпыIэгъум зыфагъэзагъ. Ар ыпэрэ илъэсым егъэпшагъэмэ, процент 21,9-кIэ нахь макI. Псэушъхьэ Iэлмэ шъобж зэфэшъхьафхэр атыращагъэхэу медицинэ организацие­хэм нэбгыри 9 яолIагъ. 2021-рэ илъэсым мэзитIум къыкIоцI нэбгырэ 92-м закъыфагъэзагъ. БлэкIыгъэ илъэсым мыщ фэдэ иуахътэ егъэпшагъэмэ, ар процент 25,2-кIэ нахь макI.

— ШъунаIэ тетэдзэ, псэу­шъхьэхэр яцэкъагъэу нахьыбэ­рэмкIэ гумэкIыгъо хафэхэрэр кIэлэцIыкIухэр ары. Ахэм ренэу мы IофыгъомкIэ гущыIэгъу шъуафэхъун, ащ зызэращау­хъумэщтыр афэшъуIотэн фае. Псэушъхьэр къецэкъагъэмэ, лъа­бжъэкIэ рищыгъэмэ е Iупсыр пкъышъолым къытригъэнагъэмэ, медицинэ IэпыIэгъу псынкIэу зыфэбгъэзэн фае, — къыщы­хагъэщыгъ Роспотребнадзорым и ГъэIорышIапIэу АР-м щыIэм ипресс-къулыкъу.

Абрэдж Сэтэнай.