Къыблэ федеральнэ шъолъырым истудентхэр къекIолIэщтых

Мэлылъфэгъум и 9-м къыщегъэжьагъэу и 11-м нэс поселкэу Каменномостскэм дэт зекIо базэу «Горная» зыфиIорэм Къыблэ федеральнэ шъолъырым истудентхэм яфестиваль – спартакиадэ щызэхащэщт.

Физическэ культурэм, спортым ныбжьыкIэхэр пыщэгъэнхэр, творчествэм ылъэныкъокIэ сэнаущыгъэ зыхэлъхэр къыхэгъэщыгъэнхэр ары зэхэщакIохэм пшъэрылъэу зыфагъэуцужьырэр.

«Российские Студенческие Отряды» зыфиIорэ ныбжьыкIэ урысые общественнэ организацием и Адыгэ шъолъыр къутам Iофтхьабзэм изэхэщакIор.

Мэлылъфэгъум и 9-м мэфэкI шIыкIэм тетэу фестивалыр къы­зэIуахыщт. Къыблэ федеральнэ шъолъырымкIэ Урысые студенческэ отрядхэм ахэтхэр ары ащ хэлэжьэщтхэр. АрмреслингымкIэ, волейболымкIэ, баскетболымкIэ, дартсымкIэ, кибер- спортымкIэ ныбжьыкIэхэр зэнэкъокъущтых. Нэужым интеллектуальнэ джэгукIэу «Что? Где? Когда?» зыфиIорэр зэхащэщт, ащ ыуж адыгэ этносым фэгъэхьыгъэ тематическэ квест щыIэщт.

Фестиваль — спартакиадэм къыдыхэлъытагъэу творчествэм ылъэныкъокIи ныбжьыкIэхэр зэнэкъокъущтых. «Вокал», «Оригинальный жанр», «Хореография» зыфиIорэ лъэныкъохэмкIэ заушэтыщт.

Iофтхьабзэр мэлылъфэгъум и 11-м зэфашIыжьыщт. Респуб­ликэм ичIыпIэ дахэхэр хьакIэхэм арагъэлъэгъущтых.

ДЕЛЭКЪО Анет.