Балалайкэм ибзэпсхэр мэжъынчых

Урыс музыкантэу Василий Андреевыр къызыхъугъэр илъэси 160-рэ зэрэхъугъэм фэгъэхьыгъэ пчыхьэзэхахьэ Мыекъуапэ щыкIуагъ.

Адыгэ Республикэм и Къэралыгъо филармоние и Къэралыгъо оркестрэу «Русская удалым» къытыгъэ концертыр лектор-искусствоведэу Ирина Ибрагимовам зэрищагъ.

Василий Андреевым балалайкэмкIэ орэдышъохэр къы­ригъа­Iохэзэ, дунаим цIэрыIо щыхъугъ.

Урыс лъэпкъ музыкальнэ Iэмэ-псымэхэр зыхэт оркестрэр 1888-рэ илъэсым хэгъэгум апэу щызэхэзыщагъэр В. Андреевыр ары.

Европэм ихэгъэгухэм, США-м оркестрэр ащыIагъ. Францием къыщатыгъэ концертхэр анахь гъэшIэгъонхэм ащыщыгъэх.

ЦIыф къызэрыкIохэм балалайкэмкIэ орэдышъохэр къырагъэ­Iонхэм В. Андреевым фигъасэщтыгъэх. ДзэкIолIхэр музыкэм фэщагъэхэу гъэсэгъэнхэм иIа­хьышIу хилъхьагъ.

«Балалайкэм пае еджапI» зыфиIорэ апэрэ тхылъэу балалайкэм фэгъэхьыгъэр В. Андреевым 1894-рэ илъэсым къыди­гъэкIыгъ.

Музыкант цIэрыIом ехьылIэгъэ зэхахьэр гъэшIэгъонэу филармонием щыкIуагъ. «Русская удалым» ихудожественнэ пащэу, Адыгэ Республикэм инароднэ артистэу Андрей Ефименкэр оркестрэм идирижер шъхьаI. Ащ къызэриIуа­гъэу, артистхэм В. Андреевым иIофшIагъэ осэшхо раты. Балалайкэм ибзэпсхэр «къагъэгущыIэх».

Урысыем, Дунэе зэнэкъокъу­хэм щытхъуцIэхэр къащыдэзыхыгъэхэ Анастасия Истамуловам, Николай Никитиным урыс орэдхэр къаIуагъэх. Ансамблэу «Казачатэм» иорэдыIоу, Дунэе зэнэкъокъухэм ялауреатэу Елизавета Ковешниковам мэкъэ IэтыгъэкIэ къыIогъэ орэдыр пчыхьэзэхахьэм еплъыгъэхэм агу рихьыгъ.

Цэй Любовь домбрэмкIэ, Ольга Штондэ балалайкэмкIэ произведениехэр агъэжъынчыгъэх.

Зэнэкъокъу зэфэшъхьафхэм ялауреатхэу Анатолий Быковым, Артемий Варанкиным, Делид Сильченкэм балалайкэмкIэ орэдышъохэр къырагъэIуагъэх.

В. Андреевым иорэдышъохэу «Метеор», «Марш», вальсэу «Фавиныр», нэмыкIхэри оркестрэм къыригъэIуагъэх.

Музыкант цIэрыIоу Василий Андреевыр иIофшIагъэкIэ къызэрэтхэтыр Ирина Ибрагимовам щыIэныгъэм къыхэхыгъэ щысэхэмкIэ узыIэпищэу къыIотагъ. Концертым нэбгырабэ еплъыгъ.