Утщыгъупшэщтэп, тшыпхъу кIас…

ЩыIэх цIыфхэр зэ плъэгъумэ угу имыкIыжьхэу, гупшысэ IэшIухэм ахэлъэу зыдэбгъашIохэу. Джащ фэдэу сиIэмэ ащыщэу слъытэщтыгъэ Козетэ Бек мы мафэхэм идунай ыхъожьыгъ. Гууз-лыузым сызэлъиштагъэу гупшысэ-гукъэ­кIыжь гумэкIмэ мэфэ заулэм сахэт.

ЦIыф жъугъэхэм сиIоф­шIэнкIэ сахэтынэу бэрэ хъугъэми, ащ фэдабэмэ сарихьылIагъэп. А зэIукIэгъур сигъэфабэу, зэрэсинэIосагъэм сырыгушхоу сыгу къинэжьыгъ. ЫцIэ шъыпкъагъэр Аслъанкоз, ау цIэтедзэу Козета БеккIэ еджэщтыгъэх.

Илъэс заулэкIэ узэкIэIэ­бэжьмэ, сэкъатныгъэ зи­Iэхэм яобществэу тирес­публикэ щыIэм ипащэу, шIэ­ныгъэлэжьэу Агъыржьэ­нэкъо Симхъанэ си­гъусэу Козетэ дэжь тыкIо­нэу хъу­гъагъэ. Симхъанэ Козетэ бэшIагъэу ышIэ­щтыгъэ, ныбджэгъу хьа­лэлэу иIагъ, Москва кIо къэ­си апэдэдэ ащ иунэ екIуалIэти, ифэныкъуа­гъэхэр зэригъашIэщтыгъэх, къэбарыкIэхэу хэкум илъхэм ащигъэгъуазэщтыгъэ. ЕтIани икIасэхэм ащы­гъуазэти, кIэщыгъохэр пи­гъохыщтыгъэх. Ау анахьэу зыщыгушIукIыщтыгъэр рес­публикэм хахъоу ышIыхэрэр ары.

Козетэ икъэбар Сим­хъан къэкIожь къэс къысфиIуатэщтыгъэми, сэри иIофшIагъэхэм дэгъоу сащыгъуазэу щытыгъэми, сыIукIэнэу зэрэмыхъугъэм къыхэкIэу, сыгукIэ сыгу­мэкIыщтыгъэ, апэрэмкIэ, сэри сыжурналист шъхьаем, сэ тапэ итыгъэхэм ты­раубыкIыгъэ гъогум сы­тет, ежьыр лъэгъохэщэу апэрэ адыгэ бзылъфыгъэ журналистхэм ащыщыгъ, ащ къыхэкIэуи къызэрэспэ­гъокIыщтым сигъапэщтыгъэ. ТизэIукIэгъу пчыхьэ къэсы зэхъум нахьи нахь сыкъэгумэкIыгъ. «Ныбжь шIукIаи иI, зыгорэкIэ, Сим­хъан, Козетэ къысфэмыещтми сшIэрэп» сIоу сыкъе­жьагъ, Симхъанэ инэ­плъэ­гъу къысфигъази: «зы­фэ­мыер благъэу зэригъэ­кIуа­лIэрэп ащ, къыздащ ыIуагъ», — къызысеIом, сыгу нахь къэрэхьаты­жьыгъ.

Непэ фэдэу сынэгу кIэт къызэрэспэгъокIыгъагъэр. Ар сэ сишIушIагъэу зэрэщымытыгъэр къызгурэIо, Симхъанэ «лIагъэри къыгъэущыжьыщт!» зыфаIорэм фэд, «ащ пыщэгъу дэй иIэн ылъэкIыщтэп!» ыIуагъэщтын, Козетэу плъэгъурэм егъашIэм сишIэщтыгъэ фэ­дэу къыспэгъокIыгъ. ЗэдэгущыIэгъур тестхэнэу зе­сэгъажьэм, «хъугъэ, мыр Iухри тыгъэгущыI» къыси­Iуагъ. Ау щытми, Козетэ интервьюр дытестхагъ. Бзылъфыгъэр егъашIэм сшIэщтыгъэ фэдэу къысщыхъугъ.

Сыд Iори пчыхьэм тызтемыгущыIэжьыгъэр! Апэрэ такъикъхэм ащегъэжьагъэу мо сиIахьыл гупсэ горэм дэжь сыкIуагъэфэ­дэу къысщыхъугъ. Бэ къыс­фиIотагъэр, IофшIэныр зы­регъажьэм зинэ­Iосагъэхэм арыгъунэу, лъапсэу зэрыкIыгъэм нэсыжьэу. Хэгъэгу зэошхом тызнэсым, нэпэеплъэу ыгъа­шIоу иунэ ит пкъыгъор сигъэлъэгъугъ. Джы­нэс цIыфыIэ теIэбагъэ пIоу умышIэнэу дэкIо машинкэу нэмыц лагъымэу къэуа­гъэм ыущыбзыгъэм Iэ щи­фэзэ икъэбар къысфиIо­тагъ. Машинкэм уасэ фезгъэшIыщтыгъэр къыбгуры­Iонэу щытыгъ — ар янэ иягъ.

Апэ гущыIэныр етымы­гъажьэзэ тIэкIуи сыкъэгумэкIыгъ, сыда пIомэ сэ Адыгэ радиом пае къэз­гъэгущыIэныр сипшъэры­лъыгъ, «зыгорэкIэ бзэр щыгъупшэжьыгъакъомэ» зэсIожьыгъ. Сигупшыси сы­мыушъэфэу «умыгумэкI, сэ сыкъыбдэIэпыIэщт, ­етIани джы компьютерхэр щыIэх, урысыбзэкIэ къэпIуагъэр хэзгъэзыжьзэ, зэдэгущыIэгъур згъэпсы­жьыщт!» есIуагъ. «Сыда, сыадыгэба сымыгущыIэ­шъунэу?!» ежьым къыси­Iожьыгъ. Джарэущтэу цы­хьэ бгъуитIумкIэ зэфэтшIы­жьзэ зы пчыхьэ зэдэдгъэ­кIуагъ.

КъысфиIуатэхэрэм сядэ­Iу зэхъум бэ сшъхьэ къи­­хьэщтыгъэр. Москва къэлэшхом уадыгэ бзылъфы­гъэу укIони, IэпыIэгъуи, уз­щыгугъыни уимыIэу уиакъылкIэ цIыф жъугъэ­хэм уахэуцони, пIорэр ашIошъ бгъэхъуныр а лъэ­хъаным зэрэхьылъагъэм сыригъэгупшысагъ. Ау щыт­ми, Козетэ игукъэбзэныгъэкIэ цIыфхэм агу ыщэ­фын ылъэкIыгъ. IэкIыб къэралхэм ащыпсэухэрэм чIыгужъым икъэбар алъи­гъэIэсынэу ащ къыдэхъущтыгъэ. Икъэтынхэр къыз­щыдэкIыщт уахътэм щы­гъуазэхэу ащ къежэщты­гъэх. Ужурналист зыхъукIэ ащ нахь тхъагъо зи щыIэп: артистым Iэгутео макъэм ыгу зэрэхигъахъо­рэм фэдэу, журналистыр щызгъаIэу зыIэтрэр къе­дэIухэрэр ары. Ащ фэдэ ныбджэгъу бэдэдэ иIагъ Козетэ.

ТизэIукIэгъу фэбагъэу, гушхуагъэу къысхилъхьэ­гъагъэм непэ къызнэсы­гъэм сыкъырехьакIы. А пчыхьэм гукъэкIыжьхэр къыIублыхьагъэу зэрэ­щыт­ми гу лъыстэщтыгъэ, чэщы­ми сыкъэнэнэу бэрэ къы­сэлъэIугъ, ау уахътэри хэ­­кIотагъэу, нэфшъагъоми енэцIэу щытыти, хьакIэщым сыкъэкIожьын фаеу хъугъагъэ. Нэужым си­тхылъхэу къыфэзгъэна­гъэхэм осэшхо къазэрафи­шIыгъэр сшъхьэкIэ лъэшэу гуапэ сщыхъугъ. Симхъанэ ащ фытеощтыгъэ бэрэ, ар къэси «сэламышхо къыуихыжьыгъ!» зиIокIэ, ащ фэдэ бзылъфыгъэ губзыгъэу зилъэпкъ зыIэтыгъэм нэ­Iуасэ сыфэхъунэу зэрэ­хъугъэм сырыгушхощтыгъэ. Козетэ цIыф гу къэбзагъ, журналистхэр нэжгъурхэу аIоми, ежьым уIуплъэмэ бэрэчэтыгъэр хэплъагъоу, удэгущыIэ къэси нахьыбэ къебгъэIуатэ пшIоигъоу ухъущтыгъэ. Ащ ишэн къы­гъэлъагъоу зы гупшысэ сыгу къинэжьыгъ. Сшъхьэ­кIэ нэм кIэджагорэ щы­гъынхэр сикIасэхэми, гъогу сызэрэтетыр къыдэс­лъыти, спортивнэ шъошэ шIуцIэ сщыгъэу ыдэжь сы­кIогъагъ, арыти, къысэплъи, мырэущтэу къыси­Iогъагъ: «Шъо дахэ зиIэ щыгъынхэмкIэ зыфапэзэ шIы, ахэм угу къыдащае!» Симхъанрэ сэрырэ нэужым тыщхыжьыгъ, сыда пIомэ, сэщ нахь шъуашIо­хэр зикIасэ щыIэпщтын, ау джарэущтэу ежь ыпашъхьэ сиуцонэу хъугъагъэ. Ежь кофтэ хъэгъэ шэгъуашъо ынэгу кIэджагоу щыгъэу синэплъэгъу къинэжьыгъ.

«Къэхъугъэу бэн зыфамытIыжьрэ щыIэп» аIошъ, тыгу тэгъэIэсэжьы.

Козетэ непэ иахърэт ду­най тэгъэкIотэжьми, къыт­хэмытыжьэу тIон тлъэ­кIырэп, Тхьэм зыдигъэ­загъэр рэхьатыпIэ фешI, Алахьым джэнэт лъапIэр къырет. ЕгъашIэм иIофшIагъэрэ ицIыфышIугъэрэкIэ тыгу къинэжьыщт. Гъогу маф, Козета!

Хьакъунэ Зарем.