ОшIэ-дэмышIэ IофхэмкIэ къулыкъум зыкъышъуфегъазэ!

Илъэс къэс машIом хэкIуадэхэрэм япроцент 70-р щынэгъончъэу ащ зэрэдэмызекIохэрэм къыхэкIы. Тутынешъоным ыпкъ къикIыкIэ зыкъэзыштэгъэ машIом нэбгыришъэ пчъагъэ хэстыхьэ. ПIэм, креслэм уарысэу шъон пытэхэр зэпхьылIагъэхэу щытмэ, тутын уешъо хъущтэп. Ащ фэдэ зекIуакIэр ары машIор къызыхэкIырэр.


Тутын шъуафэр хэкIым хэудзэным ыпэкIэ псы тепкIэнэу щыт. Джащ фэд шэф остыгъэри псыкIэ бгъэкIосэжьын фае, ар хэгъэнагъэу сабыйхэр къэшъумыгъанэх.

Сырнычыр ыкIи зажигалкэр джэгуалъэхэп. ТхьамыкIагъо къэмыхъуным пае кIэлэцIыкIухэм сырнычыр къамыштэным шъунаIэ тежъугъэт. ЭлектричествэмкIэ Iоф зышIэрэ пкъыгъохэм яшъумыгъаIэх, хьакум машIо пэлъэу, телевизорым Iоф ышIэу, электричествэмкIэ лэжьэрэ нэмыкI пкъыгъохэр пыгъэнагъэхэу язакъоу сабыйхэр унэм къишъумынэх.

Хьаку Iупэм иджэхашъо тенэч теIулIэгъэнэу щыт. Ащ сантиметрэ 50 х 70-рэ иинэгъэн, миллиметритIум къыщымыкIэу иIужъугъэн фае. Хьакухэм яжьэу, пыдзафэу къарышъухыхэрэм псы атешъукIи, щынэгъопIэ чIыпIэм Iушъухых. Хьакум щыгъынхэмрэ пхъэ цIынэхэмрэ щышъумыгъэчъэпхъыжьых. Шъхьаныгъупчъэ Iухъохэри, мебелыри хьакоу агъэплъырэм метрэныкъо фэдизкIэ пэчыжьэнхэ фае. Бжыхьэр къимыхьэзэ IугъоищыпIэхэм пкIэгъуасэхэр арышъухых, етIанэ мэзитIу тешIэ къэс ахэр жъу­гъэкъабзэх.

Зыщышъумыгъэгъупш мытэрэз зекIуакIэр машIом къызэрэшъуфимыгъэгъущтыр. МашIом зыкъимыштэнымкIэ шапхъэхэр ыгъэцэкIэнхэр хэти ипшъэрылъ. МашIом зыкъиштэмэ шъукъэмыщтэу телефон номерхэу «01» е «101»-м шъуатеу. МашIом шъуиунэ зыкъыщиштагъэмэ игъом шъушIэным пае джырэ шапхъэхэм адиштэу мэкъэгъэIухэр ижъугъэуцонхэ шъулъэкIыщт.

Бэрэтэрэ З.А.
Къалэу МыекъуапэкIэ ыкIи Мыекъопэ районымкIэ машIом зыкъымыштэным лъыплъэгъэнымкIэ Къэралыгъо инспектор.