Унэ къазэраратыщт сертификатхэр ятыжьыгъэным тегъэпсыхьэгъэ Iофтхьабзэр тыгъуасэ Адыгэ Республикэм и Правительствэ зычIэт унэм щыкIуагъ. Республикэм имуниципальнэ образованиехэм ащыпсэурэ унэгъо ныбжьыкIи 9 Iофтхьабзэм къырагъэблэгъагъ, ахэм азыныкъо нахьыбэмэ сабыибэ арыс.
Iофтхьабзэр къызэIуихызэ, Адыгеим и ЛIышъхьэ сертификатхэр къызыфагъэшъошагъэхэм афэгушIуагъ, щыIэкIэ-псэукIэ дэгъу яIэнэу, яунагъохэм зэгурыIоныгъэ пытэ арылъынэу афэлъэIуагъ. КъумпIыл Мурат къызэрэхигъэщыгъэмкIэ, щыIэкIэ-псэукIэу яIэр нахьышIу афэшIыгъэнымкIэ унэгъо ныбжьыкIи 138-мэ 2021-рэ илъэсым къэралыгъо IэпыIэгъу арагъэгъотыгъ. А гухэлъхэм апае къэкIопIэ зэфэшъхьафхэм сомэ миллиони 130-м ехъу къахагъэкIыгъ.
Ведомствэ программэу «Унэ къафыхэгъэкIыгъэнымкIэ ыкIи псэупIэ-коммунальнэ фэIо-фашIэхэм атефэрэ уасэм итынкIэ цIыфхэм къэралыгъо IэпыIэгъу ягъэгъотыгъэныр» зыфиIорэм къыдыхэлъытагъэу мы Iофтхьабзэр зэшIуахы. Программэр агъэфедэу заублагъэм къыщегъэжьагъэу, нэмыкIэу къэпIон хъумэ, 2006-рэ илъэсым къыщыублагъэу, унэгъо ныбжьыкIэ 2400-рэ фэдизмэ ящыIэкIэ-псэукIэ нахьышIу афашIыгъ, ахэм сомэ миллиард 1,6-рэ къафыхагъэкIыгъ.
«Адыгеим щыпсэухэрэм апашъхьэ социальнэ пшъэрылъэу щытиIэхэр тэгъэцакIэх. Ащ фэдэ Iофтхьабзэхэр зытегъэпсыхьагъэхэр цIыфхэм ящыIэкIэ-псэукIэ зыкъегъэIэтыгъэныр ары. Хэгъэгум и Президентэу Владимир Путиным унагъохэм IэпыIэгъу афэхъугъэным епхыгъэ Iофыгъохэм лъэшэу ынаIэ атырегъэты, унагъом игъэпытэн тегъэпсыхьэгъэ амалхэм ренэу яусэ. Зыщыпсэущтхэ унэхэр ядгъэгъотызэ, ныбжьыкIэхэр республикэ гупсэм къинэнхэм тыдэлажьэ, демографие Iофхэми язытет нахьышIу мэхъу», — къыIуагъ Адыгеим и ЛIышъхьэ.
Къэлэдэсхэми, къоджэдэсхэми ящыIэкIэ-псэукIэ зыкъегъэIэтыгъэным тегъэпсыхьагъэу республикэм Iофышхо зэрэщашIэрэр Iофтхьабзэм щыхагъэунэфыкIыгъ. Къэралыгъо программэхэмрэ лъэпкъ проектхэмрэ къадыхэлъытагъэу къэралыгъом мылъкушхо цIыфхэм къафетIупщы. ГущыIэр анахьэу зыфэгъэхьыгъэр инженер сетьхэмрэ гъогухэмрэ зызэрарагъэушъомбгъурэр, медицинэм хэхъоныгъэ зэришIырэр, гурыт еджапIэхэр, кIэлэцIыкIу IыгъыпIэхэр, культурэмкIэ унэхэр, спорт псэуалъэхэр зэрагъэпсыхэрэр ары. Джащ фэдэу социальнэ лъэныкъомкIи республикэм Iофышхо щызэшIуахы – сабыибэ зэрыс унагъохэм чIыгу Iахьхэр араты. Ахэм къафыхагъэкIыгъэ чIыгухэм мыгъэ инфраструктурэр ащагъэпсэу аублэщт, ащ епхыгъэу а унагъохэм амал яIэщт яунэхэр газрыкIуапIэхэмрэ электрорыкIуапIэхэмрэ апашIэнэу.
УнакIэхэр къызэратыгъэхэм республикэм ипащэхэм тхьашъуегъэпсэу араIуагъ цIыфхэм ящыIэкIэ-псэукIэ зыкъегъэIэтыгъэнымкIэ, псэупIэхэр нахь зэтегъэпсыхьэгъэнхэмкIэ Iофышхо зэрашIэрэм фэшI.
Республикэм ипащэ къызэрэхигъэщыгъэмкIэ, республикэм ихэбзэ къулыкъухэм тапэкIи лъэшэу анаIэ атырагъэтыщт унэгъо ныбжьыкIэхэм IэпыIэгъу ятыгъэным епхыгъэ Iофыгъохэм. Социальнэ проектхэу мэхьанэшхо зиIэхэм ягъэцэкIэн цIыфхэр тапэкIи къызэрэхагъэлэжьэщтхэм игугъуи мы Iофтхьабзэм къыщашIыгъ.
Адыгэ Республикэм и ЛIышъхьэ ипресс-къулыкъу