Республикэм лъэпкъ культурэмкIэ и Гупчэ орэдыIо творческэ купхэм яегъэджэн зэхахьэ мэлылъфэгъум и 9-м Мыекъуапэ щызэхищэщт.
Адыгэ Республикэм икъэралыгъо программэу «Культурэм ихэхъоныгъ» зыфиIорэр щыIэныгъэм зэрэщагъэцакIэрэм Iофтхьабзэр къыпкъырэкIы. КIэлэцIыкIухэм лъэпкъ орэдхэр хорым къызэрэщаIохэрэм нахь зегъэушъомбгъугъэным зэхэщакIохэр пылъых.
Творческэ купэу «Звонницэм» щысэ тырахыным фэшI зэфэхьысыжьхэр ашIыщтых. Адыгэ Республикэм культурэмкIэ изаслуженнэ IофышIэу, «Звонницэм» ипащэу Дмитрий Гордиенкэм къызэриIуагъэу, лъэпкъ орэдхэм кIэлэцIыкIухэр нахь апыщагъэхэ зэрэхъухэрэм тегъэгушIо.
Ансамблэхэм, хорхэм, зыгъэсапIэхэм IэпыIэгъу афэхъунхэм фэшI егъэджэн зэхахьэр зэхащэ. ЦIыфхэм языгъэпсэфыгъо уахътэ нахьышIоу агъэкIонымкIэ шIыкIэшIоу щыIэхэм атегущыIэщтых.
Зэхахьэм IэпэIасэм иеджапIэ щызэхащэщт, ащ къыщыгущыIэщтых «Звонницэм», «Отрадэм» яIофышIэхэу Я. Корниенкэр, Т. Мединскаяр, Д. Новиковар, Г. Михайловыр, нэмыкIхэри. Урыс лъэпкъ орэдхэм къэIокIэ зэфэшъхьафэу яIэхэр зэфахьысыжьыщтых.
Лъэпкъ культурэм и Гупчэ ипащэу Бадый Къэплъан зэрилъытэрэмкIэ, лъэпкъ музыкальнэ искусствэр кIэлэцIыкIухэм нахь ашIогъэшIэгъон хъугъэ. Фестиваль-зэнэкъокъухэр, егъэджэнхэр зэрэзэхащэхэрэм шIуагъэу къатырэр лъэхъаным щытэлъэгъу. Анахьэу къыхэдгъэщырэр лъэпкъхэр искусствэм зэрэзэфищэхэрэр ары.