Хьасанэкъо Мурат: «Дачэ, чъыгхэтэлэжь товариществэхэм яIофыгъохэр Адыгэ Республикэм игъэкIотыгъэу щызэшIуахых»

Урысые политикэ партиеу «Единэ Россием» пшъэрылъ къызэрэфишIы­гъэм тетэу Къэралыгъо Думэм физическэ культурэмкIэ, спортымкIэ, зекIонымкIэ, ныбжьыкIэхэм яIофхэмкIэ и Комитет хэтэу Хьасанэкъо Мурат дачэ, чъыгхэтэлэжь товариществэхэм яIофыгъохэр пэIудзыгъэ шIыкIэм тетэу Урысые политикэ партиеу «Единэ Россием» и Тхьама­тэу Д. А. Медведевым ишъолъыр общественнэ приемнэу Адыгэ Рес­публикэм щыIэм цIыфхэм къащыфызэхифыгъэх.

Дачэ, чъыгхэтэлэжьыпIэ зи­Iэхэм ащыщхэр зыгъэгумэкIырэ Iофыгъохэм язэшIохынкIэ де­путатым зыкъыфагъэзагъ. Агъэ­кощырэ медицинэ комплексымкIэ зарагъэуплъэкIун алъэкIыщтмэ, кIэлэцIыкIу, спорт джэгупIэхэм язэтегъэпсыхьан, автомобиль гъогухэм ягъэцэкIэ­жьын ахэр ыгъэгумэкIыщтыгъэх.

Мыекъуапэ дэсхэр Хьасанэ­къо Мурат елъэIугъэх агъэкощырэ медицинэ комплексыр дачэ товариществэм къэкIо­нымкIэ IэпыIэгъу къафэхъунэу. Дачэхэм ренэу ащыпсэурэ нэ­бгырабэмэ ащ фэдэ медицинэ фэIо-фашIэр ящыкIэгъэ дэд.

Къэралыгъо Думэм идепутат мы Iофыгъом изэшIохынкIэ хабзэм игъэцэкIэкIо къулыкъу гъэнэфагъэ зыфигъэзагъ.

Республикэм ирайон гупчэ щызэхэщэгъэ чъыгхэтэлэжь то­вариществэм хэтхэм Iофыгъоу къаIэтыгъэр кIэлэцIыкIу, спорт джэгупIэ гъэпсыгъэн зэрэфаем епхыгъагъ. Сыда пIомэ, ятовариществэ къыпэблагъэу кIэлэцIыкIухэми, зыныбжь икъугъэ­хэми спортым зыщыпылъынхэ чIыпIэ яIэп.

Зигугъу къэтшIыгъэ Iофыгъо­хэр зэшIохыгъэнхэм пае парламентарием гъэцэкIэкIо хабзэм икъулыкъу, чIыпIэ зыгъэ­Iоры­шIэжьынымкIэ къулыкъу гъэнэфагъэхэм зафигъэзагъ.

Дачэ зиIэхэу нэмыкI муниципальнэ образованием исхэм Iофыгъоу къаIэтыгъэр ядачэхэм якIолIэрэ автомобиль гъогу тэ­рэз зэрэщымыIэр ары. Уае зы­­хъукIэ ядачэхэм анэсынхэр ахэм къин къащэхъу.

Депутатым иIэпыIэгъу пшъэ­рылъ фишIыгъ автомобиль гъо­гур зыфэгъэзагъэр зэригъэшIэ­нэу мы Iофыгъом изэшIохынкIэ ащ езэгъынхэм фэшI.

— Непэ щыIэгъэ зэхэсыгъом къызэригъэлъэгъуагъэмкIэ, дачэ, чъыгхэтэлэжь товарищест­вэхэм яIофыгъохэр Адыгэ Рес­публикэм щызэшIуахынхэмкIэ анахьэу зи­шIуагъэ къакIорэр Адыгеим и ЛIышъхьэу, партиеу «Единэ Россием» ишъолъыр къутамэ и Секретарэу КъумпIыл Мурат япащэу проектэу «Урысыем икъуадж» зыфиIорэр гъэ­хъагъэ хэлъэу зэрагъэцакIэрэр ары. ШъыпкъэмкIэ, правэм ылъэныкъокIэ зэшIохыгъэн фэе Iофыгъохэу сэ сызыхэлэжьэн фаехэр джыри щыIэх, ау илъэс къэс ахэр нахь макIэ мэхъух, — къыIуагъ парламентарием.

Зэхэсыгъом изэхэщэнкIэ Адыгэ Республикэм игъэцэкIэкIо хабзэ икъулыкъухэр IэпыIэгъу къызэрэтфэхъугъэхэр хэз­гъэунэфыкIы сшIоигъуагъ.

Къандор Анзор.
Урысые Федерацием и Фе­деральнэ ЗэIукIэ и Къэралыгъо Думэ идепутат иIэпыIэгъу.