Нахьыбэрэ щызэхащэщт

Къыблэм боксымкIэ изэнэкъо­къу АР-м испорт Унэшхоу «Ошъутенэм» гъэтхапэм и 29-м – мэлылъфэгъум и 2-м щыкIуагъ.


Илъэс 17 – 18 ыкIи илъэс 13 – 14 зыныбжь кIалэхэр бокс зэдешIагъэх. Адыгэ Республикэм ихэшыпыкIыгъэ командэ нэбгырэ 25-рэ хэтыгъ. ЯIэпэIэсэныгъэ анахь дэгъоу зыгъэфедагъэхэм медальхэр къыдахыгъэх.

Илъэс 17 – 18 зыныбжьхэм якуп дышъэр батыритIумэ къыщыдахыгъ. ТхьакIущынэ Руслъан, кг 60, Мушег Баяндурян, кг 49-рэ; апэрэ чIыпIэхэр къызэрахьыгъэхэм дакIоу, кIуачIэмрэ сэнаущыгъэу ахэлъымрэ дэгъоу къа­гъэлъэгъуагъэх.

Валентин Гапошиным, кг 60, джэрзыр къыхьыгъ.

Илъэс 13 – 14 зыныбжьхэм язэнэкъокъу хэлэжьагъэр нахьыб. ЯцIыкIугъом боксыр ашIогъэшIэгъон, текIоныгъэу къыдахырэм егъэгушхох. Сергей Кравчук, кг 90-рэ, дышъэр къыдихыгъ. Никита Жмячкиным, кг 80, апэрэ чIыпIэр къыдихи, иIэпэIэсэныгъэ зэрэхигъахъорэр къыушыхьатыжьыгъ.

Ухьазырыныгъэу къыгъэлъэгъуа­гъэмкIэ Сергей Кравчук зэхэщакIохэм къыхагъэщыгъ, Адыгэ Республикэм и ЛIышъхьэу КъумпIыл Мурат ихэушъхьафыкIыгъэ шIухьафтын къыфагъэшъошагъ.

Пщыпый Аскэр, кг 42-рэ, тыжьыныр къыдихыгъ. Бэшкэкъо Сэлымэ, кг 40, тыжьыныр къыфагъэшъошагъ. Мыекъуапэ испорт еджапIэу N 1-м, пащэр Кочнева (ЛIыбзыу) Сусан, зыщызыгъасэхэрэр зэнэкъокъум чанэу хэлэ­жьагъэх, тиныбжьыкIэхэм щысэшIу афэхъугъэх.
Апэрэ чIыпIэхэр къыдэзыхыгъэ­хэр Урысыем боксымкIэ икIэух зэIукIэгъухэу мэкъуогъу мазэм Санкт-Петербург щыкIощтхэм ахэлэжьэщтых.

Къыблэм ишъолъыри 8-мэ яныбжьыкIэхэр бокс зызэдешIэ­хэм, Краснодар краим къикIыгъэхэр медалэу къыхьыгъэхэмкIэ лъэшэу къахэщыгъэх. Ростов, Волгоград хэкухэм якIалэхэри медалыбэ къэзыхьыгъэхэм ащыщых.

Зэфэхьысыжьхэр

– Зэнэкъокъур гъэшIэгъонэу кIуагъэ, – къытиIуагъ Урысыем, Адыгеим язаслуженнэ тренерэу, Адыгэ Республкэм и Парламент идепутатэу, медалэу «Адыгеим и Щытхъузехьэр» къызыфагъэшъошагъэу Владимир Овчинниковым. – Шъолъырхэм яныбжьыкIэхэм боксыр агу рехьы, яIэпэIэсэныгъэ зэрэхагъэхъощтым пылъых. Адыгеим ибокс зеушъомбгъу. Республикэм ихэшыпыкIыгъэ командэ районхэм якIэлэеджакIо­хэр хэтых. Къоджэ спортым зыкъызэриIэтырэр ащ къегъэлъагъо.

Урысыем боксымкIэ и Федерацие и Генеральнэ секретарэу Кирилл Щекутьевыр Мыекъуапэ зэнэкъокъур зэрэщыкIуагъэм еплъыгъ. Зэхэщэн Iофхэр дэгъоу агъэцэкIагъэхэу ылъытагъ. 2023-рэ илъэсым Урысыем иныбжьыкIэхэм боксымкIэ язэнэкъокъу Адыгэ Республикэм щызэхащэ зэрэшIоигъор къыIуагъ. Адыгэ Респуб­ликэм испорт псэуалъэхэр ядэгъу­гъэкIэ Урысыем къыщыхагъэщыхэрэм ащыщых.

Зэнэкъокъум икъызэIухын фэгъэхьыгъэ зэхахьэм Адыгэ Респуб­ликэм и Къэралыгъо академическэ ансамблэу «Налмэсыр» къыщы­шъуагъ. Лъэпкъ искусствэ дахэ къызэригъэлъэгъуагъэм фэшI спортсменхр, зэхэщакIохэр афэрэзагъэх.