Гур учъыIыгъэу ешIэрэп

Мырзэ Резыуан Москва хэкум ифутбол клубэу «Химки» щешIэ. Къэбэртэе-Бэлъ­къа­рым икъалэу Бэхъсан къыщыхъугъ.

ИкIэлэцIыкIугъом спорт лъэп­къыбэ шIогъэшIэгъоныгъэми, футболыр къахихыгъ. Налщык икIэлэцIыкIу-ныбжьыкIэ спорт еджапIэу «Iошъхьэмафэм» («Эль­брусым») зыщигъасэу ригъэжьагъ. Республикэм ифутбол командэ шъхьаIэу «Спартакым» аштагъ, ау зы ешIэгъу ныIэп зыхэлэжьагъэр.

2013 — 2019-рэ илъэс зэ­нэкъокъум «Торпедо» Москва щешIагъ. 2015-рэ илъэсым «Терек» Грозный рагъэблэгъагъ, илъэси 4 щешIэнэу зэзэгъыныгъэм кIэтхагъ. «Терек» «Куань» Краснодар зыIокIэм, Р. Мырзэр апэрэу клубым ще­шIагъ.

ЦIэрыIо зыщыхъугъэр

Нарт шъаом иIэпэIэсэныгъэ зэрэхигъахъорэр футбол клубхэм япащэхэм ашIэщтыгъ. «Ростов» Ростов-на-Дону щыIэу бэджэндэу Ленинград хэкум икомандэу апэрэ купым хэтым щешIэу ыублагъ.

«Тоснэр» апэ итхэм зэра­щыщым дакIоу, Урысыем футболымкIэ и Кубок къыдэхыгъэным чанэу хэлажьэщтыгъ.

Апэрэ чIыпIэр зыхьыщтыр язэрэмыгъашIэу ешIэгъум пхъа­шэу щызэнэкъокъугъэх «Тос­нэм­рэ» «Уралрэ». Аужырэ та­къикъхэм «Тоснэр» нахь дэгъоу ешIагъ. Пчъагъэр зэфэдэу щы­тыгъ. Р. Мырзэр ухъумакIохэм аIэкIэкIи, хъагъэм дахэу Iэгуаор ридзагъ. «Тоснэм» текIоныгъэр къыдихыгъ, хэгъэгум и Кубок фагъэшъошагъ.

Адыгэ быракъыр мэбыбатэ

Мырзэ Резыуан Кубокым фэгъэхьыгъэ кIэух зэIукIэгъум щешIэзэ, къэлапчъэм Iэгуаор зэрэдидзагъэм изакъоп къы­хэдгъэщырэр. Хъагъэм Iэгуаор зэрэщычэрэгъурэр зелъэгъум, имайкэ ычIэгъ чIэлъэу адыгэ быракъым исурэт зытешIыхьэгъэ ятIонэрэ майкэр зэрэщыгъыр къыгъэлъэгъуагъ. ГушIом хэтэу ешIапIэр къызэпичъыхьагъ.

ЕшIэгъур заухым, жъогъо 12-р къызыхэлыдыкIырэ быра­къыр Мырзэ Резыуан стадионым щигъэбыбэтагъ.

Адыгэ быракъыр къыздес­хьакIыныр шэнышIу сфэхъугъ, — къыIуагъ а мафэм Резыуан.

Командэу Кубокыр къэзыхьыгъэм нэпэеплъ сурэтыр тырахы зэхъум, Р. Мырзэм адыгэ быракъыр къызэрищэкIи, нэгушIоу игъусэ ешIакIохэм ахэуцуагъ.

Тыдэ ущыIэми, лъэпкъэу узыщыщыр бгъэлъэпIэныр, ищытхъу пIэтыныр спортсменхэм шэнышIу зэрафэхъугъэм Мырзэ Резыуан егъэгушхо.

«Арсенал», «Спартак», «Химки»

Ленинград хэкум икомандэу «Тоснэр» апшъэрэ купым ще­шIэным фэмыхьазырэу зэбгыратIупщыжьыгъ. Р. Мырзэр 2018-рэ илъэсым «Арсенал» щешIагъ. ЗэIукIэгъу 23-мэ ахэлэжьагъ, къэлапчъэм Iэгуаор гъогогъуи 6 дидзагъ. «Арсенал» я 6-рэ чIыпIэр Урысыем къыщыдихыгъ.

2019-рэ илъэсым Р. Мырзэр хэгъэгум иклуб цIэрыIоу «Спартак» Москва рагъэблэгъагъ, ешIэгъу 26-мэ ахэлэжьагъ.

ХэшыпыкIыгъэ командэр

2018 — 2019-рэ илъэс ешIэгъум Р. Мырзэр Урысыем фут­болымкIэ ихэшыпыкIыгъэ коман­дэ аштагъ. Хэгъэгум икоман­дэ шъхьаIэ хэтэу ешIапIэм къимыхьагъэми, нарт шъаом ыцIэ къызэрэхагъэщыгъэм, тренер шъхьаIэу Станислав Черчесовым гущыIэ фабэхэр къызэри­Iуагъэхэм тигъэгушIуагъ.

Резыуан хэгъэгум иешIэкIо анахь дэгъухэм ясатырэ зэрэ­хэуцуагъэр дунэе къэбар хъугъэ, IэкIыб къэралхэм арыс тилъэпкъэгъухэри Р. Мырзэм къыкIэупчIагъэх.

Иныбджэгъу къытфеIуатэ

— Къалэу Бэхъсан сэри сыщыщ, Мырзэ Резыуан синыб­джэгъу, — къытиIуагъ Олимпиадэ джэгунхэм дзюдо бэнакIэмкIэ дышъэр къыщыдэзыхыгъэ Мудрэнэ Бислъан. — Резыуанрэ сэрырэ тызэпэблагъ. Тикъалэ спортсмен цIэрыIуабэ къызэрэдэкIыгъэм тытегущы­Iэу уахътэ къытэкIумэ, лъэпкъ шэн-хабзэхэм, тарихъым, культурэм гукIэ зафэтэгъазэ.

2016-рэ илъэсым Олимпиадэ джэгунхэу Рио-де-Жанейро щыкIохэрэм Мудрэнэ Бислъан дзюдомкIэ апэрэ чIыпIэр къащыдихыгъ. Нарт батырым ­ады­гэ быракъыр пчэгум щигъэбыбэтагъ, адыгэ лъэпкъым ищытхъу дунэе спортым лъагэу щиIэ­тыгъ.

Лъапсэ зимыIэ чъыг щыIэп. ЗекIо ежьэрэм ныбджэгъур ары апэу гъусэ ышIырэр. Ягулъы­тэкIэ, янэплъэгъукIэ ахэр зэгу­рэIох, зэрэлъытэх. Мудрэнэ Бислъанрэ Мырзэ Резыуанрэ ягушIуагъо зэдагощы, зыщищыкIагъэм упчIэжьэгъу зэфэхъух.

Лъым хэлъ хъугъэ шэн-ха­бзэхэр нарт батырхэм щыIэ­ныгъэм щылъагъэкIуатэх, ауж къикIырэ ныбжьыкIэхэм щысэ афэхъух.

Лъыхъорэм къегъоты

Мырзэ Резыуан «Урал», нэмыкI командэхэр къеджагъэх, ау «Химки» къыхихыгъ. Ауж къинэрэ клубым зэлъашIэрэ ешIакIоу Денис Глушаковыри рагъэблэгъагъ. «Химки» иешIакIэ псынкIэу зэхъокIыныгъэхэр фэхъугъэх. Р. Мырзэм къэлап­чъэм Iэгуаор бэрэ дидзагъ, зэхэщэн Iофыгъохэри ешIапIэм дэгъоу щегъэцакIэх.

IэпэIэсэныгъэ ин къыгъэ­лъагъозэ, ухъумакIохэм аIэкIэ­кIыныр, хъагъэм Iэгуаор ри­дзэныр Р. Мырзэм ыгу рехьы. ПсынкIэу зэрэгупшысэ-
рэм ишIуа­гъэкIэ ухъумакIохэр къызэренэкIых, «бырсыр ахелъхьэ».

ЕшIапIэм лIы фэдэу ущызе­кIоныр, уигулъытэкIэ уакъы­хэщыныр Iоф къызэрыкIоп. Узыхэт командэм, ешIакIоу къыбготым ялъытыгъэр бэ. Резыуан клуб пчъагъэ зэбли­хъугъэми, футболым фыщы­тыкIэу фыриIэр къе­Iыхырэп. ШIыкIэшIухэм алъы­хъузэ, текIоныгъэм фэбэнэныр ипшъэры­лъэу елъытэ.

Гур чъыIэу ешIапIэм ихьэрэп. Загъорэ плъыр-стырым хилъа­сэмэ, лъэпкъ шэн-хэбзэ пытэхэм къащыуцун елъэкIы.

2020 — 2021-рэ илъэс ешIэгъум паублэжьыгъ. «Химки» апшъэрэ купым къыхэзынымкIэ щынагъо иIэжьэп. Мырзэ Резыуан иешIакIэ хигъэхъонэу, нахьыбэрэ тигъэгушIонэу фэтэIо.

Адыгеир къэралыгъо гъэпсыкIэ иIэу зыпсэурэр илъэси 100 зэрэхъурэм спортсменхэм мэхьэнэ ин раты. «Зэнэкъокъухэм тахэлажьэзэ, адыгэ лъэпкъым ибыракъ дгъэбыбэтэщт, — къытаIуагъ Мудрэнэ Бис­лъанрэ Мырзэ Резыуанрэ. —МэфэкI зэхахьэхэм тащызэIу­кIэщт, тигъэхъагъэхэм ахэдгъэ­хъощт».