Дышъэу 2, джэрзэу зы

Урысыем кушъхьэфэчъэ спортымкIэ изэIукIэгъухэр Къырым щыкIуагъэх.

Илъэс 17 — 18 зыныбжьхэм язэнэкъокъу Адыгэ Республикэм ихэшыпыкIыгъэ командэ хэтэу Кристина Новиковам апэрэ чIыпIэр къыщыдихыгъ. Купым хэтхэу пшъашъэхэм километрэ 70-рэ къа­кIугъ.

Илъэс 19 — 22-рэ ыкIи ащ нахьыбэ зыныбжьхэр километри 100 хъурэ гъогум щызэнэкъокъугъэх. Адыгеим зыщызыгъэсэрэ Гюнель Мехеевам апэрэ чIыпIэр къыхьыгъ. Республикэм ихэшыпыкIыгъэ командэ хэтэу Елизавета Ошурковам джэрзыр къыфагъэшъошагъ.

Адыгеим щыкIощт

— Хэгъэгум кушъхьэфэчъэ спортымкIэ изэIукIэгъухэр мэлылъфэгъум и 2-м Адыгэ Республикэм щырагъэжьэщтых, — къытиIуагъ Адыгеим кушъхьэфэчъэ спортымкIэ и Федерацие ипащэу Анатолий Лелюк, — Гъозэрыплъэ икIынхэшъ, километри 10 хъурэ къушъхьэ гъогухэм ащызэнэкъокъущтых.

Москва, Санкт-Петербург, Самарэ, Удмуртием, Башкирием, Хабаровскэ, фэшъхьафхэм ябзылъфыгъэ командэхэр Адыгеим щызэIукIэщтых. Мэфэ заулэрэ зэнэкъокъур Адыгеим игъогухэм ащыкIощт.