УФ-м и Президентэу Владимир Путиным банкым е нэмыкIэу кредит зытырэ организациехэм къаIихыгъэр зымытыжьышъугъэхэм е нэмыкI чIыфэ зытелъхэм ар аIахыжьы зыхъукIэ зэрэпсэунхэ ахъщэ къафэгъэнэгъэным фэгъэхьыгъэ законопроект УФ-м и Къэралыгъо Думэрэ Правительствэмрэ зэдагъэхьазырынэу пшъэрылъ къафишIыгъ. 
ЦIыфым чIыфэр игъом ымытыжьышъумэ, иIоф хьыкумыр хэплъэнэу тхылъхэр ратых, ащ рихъухьагъэр нэужым приставхэм аIэкIахьэ. Ахэм чIыфэр зытелъым исчет къихьэрэ ахъщэм хахызэ къызIихыгъэм ратыжьы. Ащ фэдэу зыIахыжьыхэрэм зэрэпсэун зыпари къызфэмынэжьэу къахэкIырэр бэ. Ащ тетэу цIыфхэм хэкIыпIэ ямыIэжьэу къамыгъэнэнхэр, узэрэпсэун плъэкIыщт ахъщэ анахь макIэм фэдизыр къафэухъумэгъэныр ары къэралыгъом ипащэ зигугъу къышIыгъэр.
Хэбзэгъэуцухэми мы Iофыгъор нахьыпэкIэ къаIэтыгъагъ. Урысые политикэ партиеу «Единая Россия» зыфиIорэр ащ фэдэ законопроект кIэщакIо фэхъугъагъ. Ащ ифракциеу УФ-м и Къэралыгъо Думэ хэтым итхьаматэ игуадзэу Андрей Исаевым цIыфым сыд фэдиз чIыфэ телъыми, зэрэпсэун къыфэнэн фаеу зэрилъытэрэм къыкIигъэтхъыгъагъ.
Президентым зигугъу къышIыгъэ законопроектыр чIыфэ зытелъхэм яфитыныгъэхэр къэухъумэгъэнхэмкIэ джыри зы лъэбэкъоу хъущт. Ащ ыпэкIэ социальнэ ахъщэ тынхэр аубытынхэ фимытхэу къызщиIорэ хэбзэгъэуцугъэр аштагъ. БлэкIыгъэ 2020-рэ илъэсым игъэмафэ ащ кIуачIэ иIэ хъугъэ. Джы ащ фэдэ ахъщэ тынхэм тамыгъэ гъэнэфагъэ яIэу щыт, приставхэм ахэр аштэнхэ алъэкIыщтэп. Унагъор зыIыгъыгъэр дунаим зэрехыжьыгъэм пае къатырэ пособиер, ошIэ-дэмышIэ Iофхэм яягъэ зэрагъэкIыгъэхэм къафакIорэ ахъщэ тынхэр, нэмыкIхэр ащ къыхеубытэх.