«Спартак» лъэкIуатэ, ЦСКА-р…

Урысые Федерацием фут­бо­лымкIэ изэнэкъокъоу апшъэрэ купым щыкIорэм хэлэжьэрэ клубхэм я 23-рэ зэIукIэгъухэр яIагъэх.

2020 — 2021-рэ илъэс ешIэгъум текIоныгъэр къыщыдэзыхыщтыр язэрэмыгъашIэу зэIукIэгъухэр макIох.

ЕшIэгъухэр

«Ротор» — «Ростов» — 0:4, «Ахмат» — «Арсенал» — 2:0, ЦСКА — «Зенит» — 2:3, «Уфа» — «Локомотив» — 0:1, «Спартак» — «Урал» — 5:1, «Краснодар» — «Динамо» — 2:3, «Шъачэ» — «Тамбов» — 5:0, «Рубин» — «Химки» — 1:3.

«Ахмат» блэкIыгъэ ешIэгъуитIури шIуа­хьыгъэу «Арсенал» зыIокIэм, Семеновым я 33-рэ, Ильин я 47-рэ такъикъхэм къэлапчъэм Iэгуаор дадзагъ. Ауж къинэрэ командэхэм «Ахмат» псынкIэу къахэкIыжьы.

ЦСКА-р «Зенит» кIэхьажьыщтэу нэбгырабэ гугъэщтыгъэ. Ары шъхьае, Iофхэр нэмыкIэу лъэкIуатэх. Рондон я 28-рэ та­къикъым «Зенит» икъэлапчъэ Iэгуаор ди­дзагъ. Дзюбэ я 33-рэ, Вендел я 50, 77-рэ такъикъхэм пчъагъэм хагъэхъуагъ — 1:3.

Дзюбэ я 45-рэ такъикъым пенальтир зегъэцакIэм, ЦСКА-м икъэлэпчъэIутэу Акинфеевым Iэгуаор къыубытыгъ. ЕшIэгъур кIэухым факIозэ Влашич пенальтикIэ «Зенит» икъэлапчъэ Iэгуаор дидзагъ. «Зенит» текIоныгъэр 3:2-у къыдихи, зэнэкъокъум щы­лъыкIотагъ. ЦСКА-м зэкIэлъыкIоу зэIукIэ­гъуи 2 шIуахьыгъ. Зичэзыу зэIукIэгъухэр «Тамбов», «Ротор» къашIуихьыщтми тшIэ­рэп, ау «Шъачэ», «Спартак» адешIэмэ, зэ­нэ­къо­къум къырыкIощтыр нахь нафэ хъущт.

«Спартак» зэкIэлъыкIоу текIоныгъи 3 къыдихыгъ, гъогогъу 13 хъагъэм Iэгуаор дидзагъ. «Спартак» «Урал» зыдешIэм, Ларссон я 12,58-рэ, Промес я 26-рэ, Соболевым пенальтикIэ я 45,90+7-рэ такъикъхэм хъагъэм Iэгуаор дадзагъ.

ЦСКА-р къызэкIэкIуагъ, «Спартак» лъыкIотагъ. «Зенит» апэ итми, гумэкIыгъуабэ иI. «Химки», «Шъачэ», «Краснодар», нэмыкI клуб лъэшхэм зэкIэлъыкIоу адешIэщт.

«Рубин» апэ ишъыгъэхэм бэрэ ахэтын ылъэкIыгъэп. Казань зэIукIэгъур щышIуа­хьыгъ. Мырзэ Резыуан пенальтикIэ «Рубин» икъэлапчъэ Iэгуаор дидзагъ. Могилевец, Кухарчук пчъагъэм хагъэхъуагъ, 3:1-у текIоныгъэр къыдихыгъ.

Крыховяк я 80-рэ такъикъым «Уфа» икъэлапчъэ Iэгуаор дидзагъ, «Локомотив» 1:0-у зэIукIэгъум щытекIуагъ. «Ростов» 4:0-у «Ротор» зытекIом, Волгоград икомандэ итренерхэр яIэнатIэхэм аIуагъэкIыгъэх.

«Краснодар» «Динамэм» текIон фэягъэ. Вильен я 11-рэ, Газинскэм я 51-рэ та­къикъхэм «Динамэм» икъэлапчъэ ихъагъэ Iэгуаор дадзагъ — 2:0. «Динамэм» иешIакIоу Фоминыр лъэшэу зэогъэ Iэгуаор чэрэгъузэ, Бабуриным къыухъумэрэ къэлап­чъэм икъогъупэ къофагъ. Я 66-рэ такъикъым «Краснодар» иухъумэкIуитIу щытэу Тюкавиныр ешIапIэм тефэзэ шъхьэкIэ Iэгуаом еуи, хъагъэм дидзагъ. Лъэшэу дгъэшIагъорэр пчъагъэр 2:2 хъугъэу Тюкавиным ящэ­нэрэ Iэгуаор хъагъэм зэрэдидзагъэр ары. Тюкавиныр ыпэкIэ зелъым, «Краснодар» иухъумакIо IэкIэ еIункIи, ешIапIэм тыри­дзагъ, къэлапчъэм Iэгуаор дидзагъ — 2:3.

Судьяхэм ар икъоу зыкIамылъэгъугъэр, ВАР-м унэшъо тэрэз зыкIимышIыгъэр гурыIогъуаех. Зэфагъэ къызыхагъэфэным ычIыпIэкIэ ар спорт бэнэгъум хэхьэрэ ешIа­кIэу судьяхэм ащыщ къыIуагъ. Евгений Ловчевым зэфэхьысыжь ышIызэ, Тюкавиныр ухъумакIом IэкIэ зэреIункIыгъэр къыхигъэщыгъ, ау судьям пхъашэу пэуцугъэп.

«Краснодар» икапитанэу А. Мартынович зэIукIэгъум хэлэжьагъэп. Клубыр шIэхэу «Ахмат», «Зенит», нэмыкI командэ лъэшхэм адешIэщт. «Краснодар» «Динамэм» зыIокIэм, ухъумакIоу Кайо судьям ешIапIэм ригъэкIи, «Краснодар» нэбгыри 10 хъоу такъикъ 65-м нахьыбэ «Динамэм» дешIагъ. «Шъачэ» тегъэгушIо, апэ итхэм пытэу ахэуцуагъ.

Зэтэгъапшэх

1. «Зенит» — 48
2. «Спартак» — 44
3. «Локомотив» — 40
4. «Шъачэ» — 40
5. ЦСКА – 40
6. «Динамо» — 39
7. «Ростов» — 37
8. «Рубин» — 37
9. «Химки» — 35
10. «Краснодар» — 34
11. «Ахмат» — 26
12. «Урал» — 26
13. «Ротор» — 18
14. «Арсенал» — 17
15. «Уфа» — 14
16. «Тамбов» — 13.
Я 24-рэ
зэIукIэгъухэр
04.04
«Зенит» — «Химки»
«Ростов» — «Спартак»
«Краснодар» — «Ахмат»
«Динамо» — «Уфа»
«Тамбов» — ЦСКА
«Рубин» — «Шъачэ»
«Ротор» — «Локомотив»
«Урал» — «Арсенал».