Рэзэныгъэ тхылъ

2005-рэ илъэсым къыщегъэжьагъэу Респуб­ликэу Карелием икъалэу Лахденпохья спорт обществэу «Динамэм» боевой самбэмкIэ и Урысые зэнэкъокъу илъэс къэс щэкIо. Уры­сые Федерацием и ФСБ игенерал-лей­тенан­тэу Валентин Чуйкиным ыцIэкIэ ар зэхащэ.

2020-рэ илъэсым чъэпыогъум и 17-м боевой самбэмкIэ я 16-рэ Урысые зэнэ­къокъумрэ грэпплингымкIэ кIэлэцIыкIу зэнэкъокъумрэ гъэ­хъагъэ хэлъэу мыщ щыкIуагъэх.

Спорт ассоциациеу «Ныб­жьыкIэ спорт клубэу «Витязь» зыфиIоу Урысыем и ФСБ игенерал-лейтенантэу В. М. Чуйкиным ыцIэ зыхьырэр ары ахэр зэхэзыщагъэр. Зэнэкъокъум игенеральнэ спонсорэу мыкоммерческэ фондэу «Монолит» зыфиIорэмрэ общественнэ-къэралыгъо организациеу «Физкультурэ спорт обществэу «Ди­намэм» КарелиемкIэ ишъолъыр къутамэрэ ащкIэ IэпыIэгъу къыфэхъугъэх.

Илъэсыбэ хъугъэу Адыгеим ихэшыпыкIыгъэ куп Карелием щыкIорэ зэнэкъокъум чанэу хэлажьэ, мызэу, мытIоу текIоныгъэр ащ къыщыдихэуи хъугъэ. Адыгеим испортсменхэу ащ фэдэ зэнэкъокъухэм ахэлэжьагъэхэм Урысыем изэнэкъокъу­хэм призхэр ыужкIэ къащахьэу къыхэкIыгъ. Абазэ Ислъам, Муд­рэнэ Казбек, ДышъэкI Резуан, Тхьаркъохъо Салым, Шъы­нахъо Аслъан Урысыем спортымкIэ имастер хъугъэх. Абазэ Ислъам Урысыем ичемпион хъугъэ, дунэе зэнэкъокъум джэрз медаль къыщихьыгъ, дунэе кубкэр тIогъогогъу къыдихыгъ. ЛъэрыкIо Мурат урысые, дунэе кубкэхэр къыфагъэшъошагъэх, спортымкIэ дунэе классыцIэ зиIэ мастер хъугъэ. Мус­тафо Сандрахмоновым Урысыем ичемпионат джэрз ме-даль къыщихьыгъ, В. М. Чуйкиным ыцIэкIэ зэхащэгъэ зэнэ­къокъум ятIонэрэ чIыпIэр къыщыдихыгъ.

Спортсменхэми, боевой самбэмкIэ обществэу «Динамэм» изэнэкъокъу Адыгеим испорт­сменхэр хэлэжьэнхэмкIэ Iэпы­Iэгъу къафэхъугъэ пстэуми лъэ­шэу тызэрафэразэр ятэIо.

Самбэм псауныгъэр зэригъэ­пытэрэм нэмыкIэу, хэгъэгум ыпашъхьэ пшъэрылъэу щыряIэр агъэцэкIэным — Урысые Федерацием и УIэшыгъэ КIуа­чIэ­хэм къулыкъу ащахьыным кIа­лэхэр фегъэхьазырых.

Боевой самбэмкIэ зэнэкъо­къоу Адыгэ Республикэмрэ Республикэу Карелиемрэ яхэшыпыкIыгъэ купхэм ахэтхэр зыхэлэжьэщтхэр мы охътэ бла­гъэм Мыекъуапэ щызэхащэнэу тэгугъэ. Адыгеим исамбистхэм спортым текIоныгъакIэхэр щашIынэу, ятренерхэм псау­ныгъэ пытэрэ насыпрэ яIэнэу тафэлъаIо.

Общественнэ-къэралыгъо ор­ганизациеу «Физкультурэ спорт обществэу «Динамэм» КарелиемкIэ ишъолъыр къутамэ итхьаматэу А. А. Барышев

Мыкоммерческэ фондэу «Монолитым» ипащэ иупчIэжьэгъоу А. В. Фетюлина

Спорт ассоциациеу «НыбжьыкIэ спорт клубэу «Витязь» зыфиIоу Урысыем и ФСБ игенерал-лейтенантэу В. М. Чуйкиным ыцIэ зыхьырэм» ипрезидентэу А. А. Краснов